അന്തരിച്ച പ്രിയ താരം ഷെയ്ന്‍ വോണിന്റെ ഓര്‍മകളില്‍ വിതുമ്പി ഒാസീസ് മുന്‍ നായകന്‍ റിക്കി പോണ്ടിംഗ്. വോണിന്റെ മരണം ഞെട്ടിക്കുന്നതും അവിശ്വസനീയവുമാണെന്ന് പറഞ്ഞ പോണ്ടിംഗ് ഒരു കുടംബാംഗത്തെ തന്നെയാണ് തനിക്ക് നഷ്ടമായതെന്ന് പറഞ്ഞു.
‘ഇത് വാക്കുകളില്‍ വിവരിക്കാന്‍ പ്രയാസമാണ്. എനിക്ക് 15 വയസ്സുള്ളപ്പോള്‍ അക്കാദമിയില്‍ വെച്ചാണ് ഞാന്‍ അദ്ദേഹത്തെ ആദ്യമായി കാണുന്നത്. അവന്‍ എനിക്ക് വിളിപ്പേര് തന്നു. ഒരു പതിറ്റാണ്ടിലേറെയായി ഞങ്ങള്‍ ടീമംഗങ്ങളായിരുന്നു. എല്ലാ ഉയര്‍ച്ചയിലും താഴ്ചകളിലും ഒരുമിച്ച് നടന്നു. അദ്ദേഹം എപ്പോഴും ആശ്രയിക്കാവുന്ന ഒരാളായിരുന്നു.’
‘നമുക്ക് ആവശ്യമുള്ളപ്പോള്‍ നമ്മോടൊപ്പം ഉണ്ടായിരിക്കുകയും എപ്പോഴും തന്റെ സഹതാരങ്ങള്‍ക്ക് മുന്‍ഗണന നല്‍കുകയും ചെയ്യുന്ന ഒരാള്‍. ഞാന്‍ ഇതുവരെ കളിച്ചിട്ടുള്ളതില്‍ വെച്ച് ഏറ്റവും മികച്ച ബോളര്‍. റെസ്റ്റ് ഇന്‍ പീസ് കിംഗ്’ പോണ്ടിംഗ് പറഞ്ഞു.
തായ്ലന്‍ഡിലെ വില്ലയില്‍വെച്ച് ഹൃദയാഘാതത്തെ തുടര്‍ന്നാണ് വോണ്‍ മരണപ്പെട്ടത്. വോണിന്റെ മൃതദേഹം ഓസ്‌ട്രേലിയയിലെത്തിക്കാനുള്ള നടപടികള്‍ പുരോഗമിക്കുകയാണ്. അതിനു ശേഷമേ സംസ്‌കാര തീയതി തീരുമാനിക്കൂ.