ഈ മാസം ഏഴാം തിയതി മുതൽ ആരംഭിക്കുന്ന ടി20 ലോകകപ്പിനായുള്ള തയ്യാറെടുപ്പിലാണ് എല്ലാ ടീമുകളും. ഇന്ത്യയും ശ്രീലങ്കയും ചേർന്നാണ് ഇത്തവണ ടൂർണമെന്റിന് ആതിഥേയത്വം വഹിക്കുന്നത്. ഇപ്പോഴിതാ ഇന്ത്യക്കെതിരെയുള്ള മത്സരത്തില് നിന്നും പിന്മാറിയിരിക്കുകയാണ് പാകിസ്താന് ക്രിക്കറ്റ് ടീം.
പാകിസ്താന് സര്ക്കാരാണ് ഇക്കാര്യം പ്രഖ്യാപിച്ചത്. ബംഗ്ലാദേശിനെ പുറത്താക്കിയതിന് ശേഷമാണ് പാകിസ്താന്റെ തീരുമാനം. ശ്രീലങ്കയില് നടക്കുന്ന ബാക്കി മത്സരങ്ങളിലെല്ലാം പങ്കെടുക്കാന് പാകിസ്താന് ടീമിന് അനുവാദം നല്കിയതായും സര്ക്കാര് അറിയിച്ചു.
‘2026 ലെ ഐസിസി വേള്ഡ് ടി20യില് പങ്കെടുക്കാന് പാകിസ്താന് ക്രിക്കറ്റ് ടീമിന് ഇസ്ലാമിക് റിപ്പബ്ലിക് ഓഫ് പാകിസ്ഥാൻ സര്ക്കാര് അനുമതി നല്കുന്നു. എന്നിരുന്നാലും, ഫെബ്രുവരി 15 ന് ഇന്ത്യയ്ക്കെതിരെ നടക്കാനിരിക്കുന്ന മത്സരത്തില് പാകിസ്താന് ക്രിക്കറ്റ് ടീം കളത്തിലിറങ്ങില്ല,’ പാകിസ്താന് സര്ക്കാര് എക്സില് കുറിച്ചു. പാകിസ്താന് പ്രധാനമന്ത്രി ഷെഹ്ബാസ് ഷെരീഫും പിസിബി മേധാവി മൊഹ്സിന് നഖ്വിയും തമ്മിലുള്ള കൂടിക്കാഴ്ചയ്ക്ക് ശേഷം ഞായറാഴ്ച വൈകുന്നേരമാണ് പാകിസ്താന് സര്ക്കാര് ഈ തീരുമാനം സ്ഥിരീകരിച്ചത്.