ഏകദിന ലോകകപ്പ് തുടങ്ങാന്‍ ദിവസങ്ങള്‍ മാത്രം ശേഷിക്കെ വമ്പന്‍ പ്രവചനവുമായി പാകിസ്ഥാന്‍ മുന്‍ താരം സല്‍മാന്‍ ബട്ട്. ലോകകപ്പില്‍ ഇത്തവണ ഫേവറേറ്റുകളായി നാല് ടീമുകളില്ലെന്നും അത് ഇന്ത്യ മാത്രമാണെന്നും ബട്ട് പറഞ്ഞു. ഏതെങ്കിലും ടീം ഇന്ത്യയെ തോല്‍പ്പിച്ചാല്‍ അവര്‍ കിരീടം നേടുമെന്നും എന്നാല്‍ ഇന്ത്യയെ തോല്‍പ്പിക്കാന്‍ ആര്‍ക്കും സാധിച്ചേക്കില്ലെന്നും ബട്ട് പറഞ്ഞു.
ഇന്ത്യന്‍ ക്രിക്കറ്റ് ടീം വലിയ വളര്‍ച്ചയാണ് സമീപകാലത്തായി കൈവരിച്ചിരിക്കുന്നത്. എല്ലാ ടീമുകളും നാല് ടീമുകളെയൊണ് പ്രധാനമായും ഫേവറേറ്റുകളായി വിശേഷിപ്പിക്കുന്നത്. എന്നാല്‍ ഞാന്‍ വിശ്വസിക്കുന്നത് ഇന്ത്യയെ തോല്‍പ്പിക്കുന്ന ടീം ഏതാണോ അവരാവും കപ്പ് നേടുകയെന്നാണ്.
ഇന്ത്യയാണ് ഏറ്റവും മികച്ച ടീം. ഇന്ത്യയുടെ ബാറ്റിംഗും ബോളിംഗും ഗംഭീരമാണ്. ആതിഥേയരെന്ന നിലയില്‍ സാഹചര്യം ഇന്ത്യക്ക് അനുകൂലമാണ്. നിലവിലെ സാഹചര്യത്തില്‍ ഇന്ത്യന്‍ ടീമിനൊപ്പം നില്‍ക്കുന്ന മറ്റൊരു ടീമുമില്ല.
കഴിഞ്ഞ കുറച്ച് വര്‍ഷങ്ങളായി അത്ഭുതപ്പെടുത്തുന്ന വളര്‍ച്ചയാണ് ഇന്ത്യന്‍ ക്രിക്കറ്റ് ടീം നേടിയെടുത്തിരിക്കുന്നത്. ഫിറ്റ്നസ് നിലവാരവും മെച്ചപ്പെട്ടിട്ടുണ്ട്. എല്ലാ തരത്തിലും ഇന്ത്യന്‍ ക്രിക്കറ്റ് ടീം മുന്നിട്ട് നില്‍ക്കുകയാണ്-സല്‍മാന്‍ ബട്ട് പറഞ്ഞു.
