ലോകകപ്പിലെ ഏറ്റവും മികച്ച ബാറ്റിംഗ് നിര ദക്ഷിണാഫ്രിക്കയുടേതെന്ന് മുന് ക്യാപ്റ്റന് ഗ്രെയിം സ്മിത്ത്. മികച്ച രീതിയിലാണ് ബാവുമ ടീമിനെ നയിക്കുന്നതെന്നും ലോകകിരീടമെന്ന സ്വപ്നം ദക്ഷിണാഫ്രിക്ക ഇത്തവണ ഉറപ്പായും സ്വന്തമാക്കുമെന്നും മുന് ക്യാപ്റ്റന് പറഞ്ഞു.
ടൂര്ണമെന്റില് ടീമിന്റെ പ്രകടനം ഏറ്റവും മികച്ചതാണ്, കിരീടം നേടി മാത്രയേ ഈ ജൈത്രയാത്ര ടീം അവസാനിപ്പിക്കൂ എന്നാണ് പ്രതീക്ഷ. ബാറ്റിംഗാണ് ടീമിന്റെ കരുത്ത്. ലോകത്തെ ഏറ്റവും മികച്ച ബാറ്റര്മാരാണ് ടീമിനുള്ളത്. എയ്ഡന് മാര്ക്രം, ഹെന്റിച്ച് ക്ലാസന്, ഡേവിഡ് മില്ലര് എന്നിവരടങ്ങുന്ന മധ്യനിരയാണ് ടീമിന്റെ കരുത്ത്. ലോകകപ്പില് സ്വന്തന്ത്രമായി ബാറ്റുവീശാനാകുന്നതാണ് ദക്ഷിണാഫ്രിക്കയുടെ പ്ലെസ് പോയിന്റ്.
മികച്ച രീതിയിലാണ് ബാവുമ ടീമിനെ നയിക്കുന്നത്. തിരിച്ചടികളില് പതറുന്ന ക്യാപ്റ്റനല്ല മറിച്ച് തിരിച്ചടികളില് നിന്ന് പഠിക്കുന്ന ക്യാപ്റ്റനാണ് ബാവുമ. ദക്ഷിണാഫ്രിക്കന് ടീം കിരീടം നേടിയാലത് രാജ്യത്ത് കായിക രംഗത്തിന് വലിയ കുതിപ്പാകും. റഗ്ബി ടീം അടുത്തിടെയാണ് വിശ്വകിരീടം നാട്ടിലേക്കെത്തിച്ചത്, അതിന്റെ തുടര്ച്ചയായി ക്രിക്കറ്റ് കിരീടം കൂടെ എത്തിയാല് യുവ തലമുറയ്ക്ക് വലിയ ആവേശമാകും- സ്മിത്ത് പറഞ്ഞു.
ഇന്ത്യയ്ക്കെതിരെയുള്ളതാകും ദക്ഷിണാഫ്രിക്കയുടെ ഈ ലോകകപ്പിലെ ഏറ്റവും കടുപ്പമേറിയ മല്സരമെന്നും സ്മിത്ത് കൂട്ടിച്ചേര്ത്തു. നവംബര് അഞ്ചിനാണ് ഇന്ത്യ ദക്ഷിണാഫ്രിക്ക പോരാട്ടം.