ഏകദിന ലോകകപ്പില്‍ ഇന്ന് നാലാം മത്സരത്തിനിറങ്ങുന്ന ന്യൂസിലാന്‍ഡിന് നിരാശ വാര്‍ത്ത. അഫ്ഗാനിസ്ഥാനെതിരായ ഇന്നത്തെ പോരാട്ടത്തില്‍ നായകന്‍ കെയിന്‍ വില്യംസണിന്റെ സേവനം ടീമിന് ലഭ്യമാകില്ല. ബംഗ്ലാദേശിനെതിരായ കഴിഞ്ഞ മത്സരത്തിനിടെയേറ്റ പരിക്കാണ് വില്യംസണിന് തിരിച്ചടിയായത്.
മത്സരത്തില്‍ ഏറെകുറെ ന്യൂസിലന്‍ഡ് വിജയം ഉറപ്പിച്ച ഘട്ടത്തില്‍ റണ്‍സിനായി ഓടുന്നതിനിടെ ബംഗ്ലാദേശ് താരത്തിന്റെ ത്രോ വിരലില്‍ കൊണ്ടാണ് വില്യംസണ് പരിക്ക് പറ്റിയത്. ഇതിന് പിന്നാലെ താരം ക്രീസില്‍ നിന്നും മടങ്ങുകയും ചെയ്തിരുന്നു.
നേരത്തെ ഈ വര്‍ഷത്തെ ഐപിഎല്ലിലെ ആദ്യ മത്സരത്തില്‍ ഫീല്‍ഡ് ചെയ്യുന്നതിനിടെയാണ് കെയ്ന്‍ വില്യംസണ് പരിക്കേറ്റിരുന്നു. പിന്നീട് നിരവധി പരമ്പരകള്‍ താരത്തിന് നഷ്ടപെട്ടിരുന്നു. ഒടുവില്‍ ഏകദിന കപ്പിലെ സന്നാഹ മത്സരത്തോടെയാണ് പ്രൊഫഷനല്‍ ക്രിക്കറ്റില്‍ വില്യംസണ് തിരിച്ചുവരവ് അറിയിച്ചത്.
മൂന്ന് കളിയും മൂന്നും വിജയിച്ച് ഇന്ത്യക്ക് പിന്നില്‍ രണ്ടാമതുള്ള കിവീസിന് അഫ്ഗാനെതിരായി ഇന്ന് ജയിച്ചാല്‍ പോയിന്റ് പട്ടികയില്‍ ഒന്നാമതെത്തും. എന്നാല്‍, ചാമ്പ്യന്മാരായ ഇംഗ്ലണ്ടിനെ വീഴ്ത്തിയെത്തുന്ന അഫ്ഗാനിസ്താനെതിരെ കിവീസിന് ജയം എളുപ്പമാവില്ല.