സുരക്ഷാ പ്രശ്നം മുന്നിര്ത്തി പാകിസ്ഥാന് പര്യടനം ഉപേക്ഷിച്ച് മടങ്ങിയ ന്യൂസിലന്ഡ് ക്രിക്കറ്റ് ടീമിനെതിരെ വിമര്ശനവുമായി പാക് മുന് താരം ഷാഹിഫ് അഫ്രീദി. ന്യൂസിലന്ഡ് ക്രിക്കറ്റ് ബോര്ഡിന് ലഭിച്ചത് വ്യാജ ഭീഷണിയാണെന്നും അതിന്റെ പേരില് പര്യടനം ഉപേക്ഷിച്ച ന്യൂസിലന്ഡ് വലിയ വില കൊടുക്കേണ്ടി വരുമെന്നും അഫ്രീദി പറഞ്ഞു.
‘പാകിസ്ഥാന് നല്കിയ എല്ലാ ഉറപ്പുകളും മറന്ന് വ്യാജ ഭീഷണികളുടെ പേരില് നിങ്ങള് പര്യടനം തന്നെ റദ്ദാക്കി. ന്യൂസീലന്ഡ് ക്രിക്കറ്റ് ടീം, ഈ തീരുമാനത്തിന്റെ അനന്തരഫലം എന്താണെന്ന് നിങ്ങള്ക്കറിയാമോ?’ അഫ്രീദി ട്വിറ്ററില് കുറിച്ചു.
വെള്ളിയാഴ്ച്ച പാകിസ്ഥാനെതിരായ ആദ്യമത്സരത്തിന് തൊട്ടു മുമ്പാണ് ടീമിനെ പിന്വലിച്ചുകൊണ്ടുള്ള ന്യൂസിലന്ഡ് ക്രിക്കറ്റ് ബോര്ഡിന്റെ അറിയിപ്പ് എത്തിയത്. കിവീസ് ടീമിന് പാകിസ്ഥാനില് സുരക്ഷാ ഭീഷണിയുണ്ടെന്ന വിവരത്തെ തുടര്ന്നായിരുന്നു ഇത്. ടീം പാകിസ്ഥാനില് തുടരുന്നത് സുരക്ഷയ്ക്ക് ഭീഷണിയാണെന്ന് രഹസ്യാന്വേഷണ റിപ്പോര്ട്ടുകള് ലഭിച്ചതായി ന്യൂസിലന്ഡ് അധികൃതര് അറിയിക്കുകയായിരുന്നു.
18 വര്ഷത്തെ നീണ്ട ഇടവേളയ്ക്ക് ശേഷമാണ് ന്യൂസിലന്ഡ് ടീം പാകിസ്ഥാന് പര്യടനത്തിന് എത്തിയത്. മൂന്ന് വീതം ഏകദിന, ടി20 മത്സരങ്ങളാണ് ന്യൂസിലന്ഡ് ടീം പാകിസ്ഥാനില് കളിക്കേണ്ടിയിരുന്നത്.