കഴിഞ്ഞ വര്‍ഷത്തെ ടി20 ലോകകപ്പില്‍ പാകിസ്ഥാനെതിരായ വിരാട് കോഹ്‌ലി കളിച്ചതു പോലെയൊരു ഇന്നിംഗ്സ് ആ സാഹചര്യത്തില്‍ കാഴ്ചവയ്ക്കാന്‍ ലോകത്തിലെ മറ്റൊരു താരത്തിനും സാധിക്കില്ലെന്ന് പാക് ഓള്‍റൗണ്ടര്‍ ഷദാബ് ഖാന്‍. ഏഷ്യാ കപ്പില്‍ ഇന്ത്യയ്‌ക്കെതിരായ മത്സരത്തിന് മുന്നോടിയായാണ് താരത്തിന്റെ ഈ തുറന്നുപറച്ചില്‍. ആ മത്സരത്തില്‍ പുറത്താകാതെ 82 റണ്‍സ് നേടിയ കോഹ് ലിയുടെ ബാറ്റിംഗ് മികവിലായിരുന്നു ഇന്ത്യ പാകിസ്ഥാനെ പരാജയപ്പെടുത്തിയത്.
വിരാട് കോഹ്‌ലി തീര്‍ച്ചയായും ലോകോത്തര താരമാണ്. അദ്ദേഹത്തെ നേരിടുമ്പോള്‍ നിങ്ങള്‍ ഒരുപാട് പ്ലാന്‍ ചെയ്യണം. എന്നിരുന്നാലും അന്താരാഷ്ട്ര ക്രിക്കറ്റില്‍ ഒരുപാട് മൈന്‍ഡ് ഗെയിമുകളുണ്ട്. നിങ്ങള്‍ ബോളറുടെയും ബാറ്ററുടെയും മനസ് എങ്ങനെ വായിച്ചെടുക്കും. നിങ്ങളുടെ മനസ്സ് അവര്‍ എങ്ങനെ വായിച്ചെടുക്കും എന്നതെല്ലാം വളരെ പ്രധാനമാണ്.
അസാധാരണ കഴിവുള്ള ബാറ്റാണ് കോഹ്‌ലി. ഞങ്ങള്‍ക്കെതിരേ അദ്ദേഹം ഗംഭീര പെര്‍ഫോമന്‍സാണ് നടത്താറുള്ളത്. കഴിഞ്ഞ വര്‍ഷത്തെ ടി20 ലോകകപ്പില്‍ ഞങ്ങള്‍ക്കെതിരായ മല്‍സരത്തില്‍ കോഹ്‌ലി കളിച്ചതു പോലെയൊരു ഇന്നിംഗ്സ് ആ സാഹചര്യത്തില്‍ കാഴ്ചവയ്ക്കാന്‍ ലോകത്തിലെ മറ്റൊരു ബാറ്റര്‍ക്കും സാധിക്കില്ല.
പാക് ബോളിംഗ് ലൈനപ്പിനെതിരേ അത്തരമൊരു ഇന്നിംഗ്സ് കളിക്കുകയെന്നത് എളുപ്പമുള്ള കാര്യമല്ല. കളിയുടെ ഏതു ഘടത്തിലും ഏതു സമയത്തും കോഹ്‌ലിക്കു അതു ചെയ്യാന്‍ കഴിയുമെന്നതാണ് അതിന്റെ സൗന്ദര്യം- ഷദാബ് പറഞ്ഞു.
