ട്വന്റി20 ലോക കപ്പ് ക്രിക്കറ്റിനുള്ള ഇന്ത്യന്‍ ടീമില്‍ ഇടം പിടിക്കാത്തതില്‍ നിരാശയില്ലെന്ന് ഇടംകൈയന്‍ പേസര്‍ നടരാജന്‍. ഏറെ നാളായി പരിക്കിന്റെ പിടിയിലായിരുന്ന നടരാജന്‍ ഐപിഎല്ലില്‍ സണ്‍റൈസേഴ്‌സ് ഹൈദരാബാദിനായാണ് കളിക്കുന്നത്.
ട്വന്റി20 ലോക കപ്പിനുള്ള ഇന്ത്യന്‍ ടീമില്‍ ഉള്‍പ്പെടാത്തതില്‍ നിരാശയില്ല. കുറച്ച് സമയംകൊണ്ട് ആ ലക്ഷ്യത്തിലെത്തുകയെന്നത് പ്രയാസകരമാണെന്ന് അറിയാം. ഞാന്‍ ടീമിലെത്തുമെന്ന് പലരും പറഞ്ഞിരുന്നു. എന്നാല്‍ പ്രതീക്ഷവച്ചു പുലര്‍ത്തിയില്ല. പരിക്കില്‍ നിന്ന് ഞാന്‍ തിരിച്ചുവരുന്നതേയുള്ളു. അഞ്ചര മാസമായി ക്രിക്കറ്റ് കളിച്ചിട്ട്- നടരാജന്‍ പറഞ്ഞു.
ഐപിഎല്ലിനുശേഷമാണ് ലോക കപ്പ് ടീമിനെ നിശ്ചയിച്ചതെങ്കില്‍ അവസരം ലഭിച്ചേനെ. എന്നാല്‍ വേണ്ടത്ര മത്സര പരിചയം ഇല്ലാതെ ടീമില്‍ ഇടം കിട്ടില്ല. നെറ്റ് ബോളര്‍ എന്ന നിലയിലെങ്കിലും ലോക കപ്പിന് പോകാമെന്നു കരുതി. പരിക്കില്‍ നിന്ന് മുക്തിനേടി ഐപിഎല്‍ കളിക്കണമെന്നതായിരുന്നു ചിന്തയെന്നും നടരാജന്‍ കൂട്ടിച്ചേര്‍ത്തു.