പലപ്പോഴും ഡഗൗട്ടിലും ഡ്രസിംഗ് റൂമിലുമെല്ലാം വെച്ച് എംഎസ് ധോണി ബാറ്റില് കടിക്കുന്നതും മറ്റും കാണാറുണ്ട്. ഇന്നലെ ഡല്ഹി ക്യാപിറ്റല്സിനെതിരായ മത്സരത്തിലും സമാനമായ രീതിയില് ധോണി ബാറ്റില് കടിക്കുന്നത് കാണാനായി. ഇപ്പോഴിത ഇങ്ങനെ ധോണി ബാറ്റില് കടിച്ച് പറിക്കുന്നതിന്റെ കാരണം വെളിപ്പെടുത്തിയിരിക്കുകയാണ് ഇന്ത്യന് മുന് താരം അമിത് മിശ്ര.
‘എംഎസ് ധോണി എന്തുകൊണ്ടായിരിക്കാം ബാറ്റിംഗിനു മുമ്പ് ബാറ്റില് കടിക്കുകയും ചവയ്ക്കുകയെന്നും ചെയ്യുന്നതെന്നു നിങ്ങള്ക്കു അദ്ഭുതം തോന്നുന്നുണ്ടാവും. ബാറ്റിലുള്ള ടേപ്പുകള് നീക്കുന്നതിനാണ് അദ്ദേഹം ഇങ്ങനെ ചെയ്യുന്നത്. ബാറ്റ് വളരെ ക്ലീനായിരിക്കണമെന്ന് ധോണിക്കു നിര്ബന്ധമുണ്ട്. അദ്ദേഹം ബാറ്റ് ചെയ്യാന് ക്രീസിലെത്തുമ്പോള് ഒരു ചെറിയ കഷണം ടേപ്പോ, നൂലോ പോലും പുറത്തുവരുന്നത് നിങ്ങള് കാണില്ല’ അമിത് മിശ്ര ട്വിറ്ററില് കുറിച്ചു.
ഡല്ഹിക്കെതിരെ നടന്ന മത്സരത്തില് മികച്ച ഫിനീഷിംഗാണ് ധോണി നടത്തിയത്. അഞ്ചാം നമ്പറില് ബാറ്റ് ചെയ്ത അദ്ദേഹം വെറും എട്ടു ബോളില് രണ്ടു സിക്സറുകളും ഒരു ബൗണ്ടറിയും സഹിതം 21 റണ്സുമായി പുറത്താവാതെ നിന്നു. 262.5 എന്ന തകര്പ്പന് സ്ട്രൈക്ക് റേറ്റിലാണ് ധോണി റണ്സ് വാരിക്കൂട്ടിയത്.
ഡല്ഹിക്കെതിരെ 91 റണ്സിനാണ് സിഎസ്കെ വിജയിച്ചത്. 209 റണ്സ് വിജയലക്ഷ്യവുമായി ഇറങ്ങിയ ഡല്ഹി 17.4 ഓവറില് 117 റണ്സിന് ഓള്ഔട്ടായി. നിലവില് 11 മത്സരങ്ങളില് നിന്നും 8 പോയിന്റുമായി ചെന്നൈ എട്ടാമതാണ്.