ഗുജറാത്ത് ടെറ്റന്‍സ് നായകന്‍ ഹാര്‍ദ്ദിക് പാണ്ഡ്യയുടെ ക്യാപ്റ്റന്‍സിയെക്കുറിച്ച് തുറന്ന് പറഞ്ഞ് സഹതാരം മുഹമ്മദ് ഷമി. നായകനായപ്പോള്‍ ഹാര്‍ദ്ദിക് കൂടുതല്‍ പക്വതയിലേക്ക് എത്തി എന്നു പറഞ്ഞ ഷമി താന്‍ ഹര്‍ദിക്കിന് നല്‍കിയ ഉപദേശം എന്താണെന്നും വെളിപ്പെടുത്തി.
‘ഹര്‍ദിക് പാണ്ഡ്യ ക്യാപ്റ്റനായപ്പോള്‍ അവന് കൂടുതല്‍ പക്വതയിലേക്കെത്തി. പ്രതികരണങ്ങള്‍ ശാന്തമായി. ലോകം മുഴുവന്‍ ക്രിക്കറ്റ് കാണുന്നതിനാല്‍ വികാരങ്ങളെ നിയന്ത്രിച്ച് നിര്‍ത്തണമെന്ന് ഞാന്‍ അവനെ ഉപദേശിച്ചിരുന്നു. നായകന്‍ കാര്യങ്ങളെ തിരിച്ചറിയുന്നവനായിരിക്കണം. സംഭവങ്ങളെയും സാഹചര്യങ്ങളേയും മനസിലാക്കേണ്ടതായുണ്ട്. അവന് അത് പരമാവധി ഭംഗിയായി ചെയ്യുന്നുണ്ട്.’
‘നായകനെന്ന നിലയില്‍ ടീമിനെ ഒന്നായി കൊണ്ടുപോകാന്‍ അവന് സാധിക്കുന്നുണ്ട്. താരമെന്ന നിലയില്‍ ക്യാപ്റ്റനെന്ന നിലയിലേക്കുള്ള ഹര്‍ദിക്കിന്റെ വളര്‍ച്ചക്ക് ഞാന്‍ സാക്ഷിയാണ്’ ഷമി പറഞ്ഞു.
ഈ ഐപിഎല്ലില്‍ ഏറ്റവും അധികം കൈയടി അര്‍ഹിക്കുന്ന നായകന്‍ ഹാര്‍ദ്ദിക്കാണ്. 13 മത്സരങ്ങളില്‍ 10ലും ടീമിന് ജയിക്കാനായി. മൂന്നെണ്ണത്തില്‍ മാത്രമാണ് ടീം പരാജയപ്പെട്ടത്. 20 പോയിന്റുമായി ഗുജറാത്ത് തന്നെയാണ് പട്ടികയില്‍ മുന്നില്‍.