ക്രിക്കറ്റിന്റെ എല്ലാ ഫോര്മാറ്റുകളില് നിന്നും വിരമിക്കല് പ്രഖ്യാപിച്ച ബംഗാള് ബാറ്റര് മനോജ് തിവാരി കളിക്കളത്തിലേക്ക് തിരിച്ചെത്തുന്നു. ക്രിക്കറ്റിന്റെ എല്ലാ ഫോര്മാറ്റില് നിന്നും വിരമിക്കുന്നതായി ഓഗസ്റ്റ് മൂന്നാം തിയതിയാണ് മനോജ് തിവാരി അറിയിച്ചത്. എന്നാല് ബംഗാള് ക്രിക്കറ്റ് അസോസിയേഷന് വീണ്ടും കളിക്കാന് ക്ഷണിച്ചതോടെ വിരമിക്കല് തീരുമാനം തിരുത്താന് താരം ഒരുങ്ങുകയായിരുന്നു.
ബംഗാള് ക്രിക്കറ്റ് അസോസിയേഷന് പ്രസിഡന്റ് സ്നേഹാശിശ് ഗാംഗുലിയാണ് തിവാരിയുമായുള്ള ചര്ച്ചയ്ക്ക് മുന്കൈയെടുത്തത്. വിരമിക്കല് തീരുമാനം പിന്വലിക്കുന്നതായി തിവാരി എന്ന് വാര്ത്താസമ്മേളനത്തിലൂടെ ഔദ്യോഗികമായി അറിയിച്ചേക്കും.
തിവാരിയില്ലാത്തത് മധ്യനിരയില് വലിയ ശൂന്യത സൃഷ്ടിക്കും എന്നാണ് ബംഗാള് ക്രിക്കറ്റ് അസോസിയേഷന്റെ വിലയിരുത്തല്. ടീം ഇന്ത്യക്കായും കളിച്ചിട്ടുള്ള താരം ഏറെക്കാലമായി ബംഗാള് ടീമിന്റെ ബാറ്റിംഗ് നെടുംതൂണായിരുന്നു. കഴിഞ്ഞ രഞ്ജി ട്രോഫിയില് മനോജ് തിവാരിയുടെ ക്യാപ്റ്റന്സിയില് ബംഗാള് റണ്ണേഴ്സ് അപ്പായിരുന്നു.
141 ഫസ്റ്റ് ക്ലാസ് മത്സരങ്ങള് കളിച്ചിട്ടുള്ള മനോജ് തിവാരി 10,000 റണ്സ് പൂര്ത്തിയാക്കുന്നതിന് 92 റണ്സ് മാത്രം അകലെയാണ്. 29 സെഞ്ച്വറികളും 45 അര്ദ്ധ സെഞ്ച്വറികളും താരത്തിന്റെ പേരിലുണ്ട്. ഇന്ത്യയ്ക്കായി 12 ഏകദിനങ്ങളില്നിന്ന് ഒരു സെഞ്ച്വറിയോടെ 287 റണ്സും 3 രാജ്യാന്തര ടി20കളില് 15 റണ്സും തിവാരി നേടിയിട്ടുണ്ട്.