പൊതുവേദിയില് സ്ഥലം എംപിയോടും മേയറോടും പരസ്യമായി ദേഷ്യപ്പെട്ട് ക്രിക്കറ്റ് താരം രവീന്ദ്ര ജഡേജയുടെ ഭാര്യയും ഗുജറാത്ത് എംഎല്എയുമായ റിവാബ ജഡേജ. ഗുജറാത്തിലെ ജാംനഗറില് ബിജെപി എംഎല്എ ആയ റിവാബയും ജാംനഗറിലെ ബിജെപി എംപിയായ പൂനംബെന് ഹേമത് ഭായിയും ജാംനഗര് മേയര് ബിനാബെന് കോത്താരിയും പങ്കെടുത്ത ചടങ്ങിലായിരുന്നു സംഭവം.
ജാംനഗര് മുനിസിപ്പല് കോര്പറേഷന് ലാക്ഹോത്ത ലേക്കില് സംഘടിപ്പിച്ച മാരി-മതി- മാരോ ദേശ് ചടങ്ങിലായിരുന്നു എംപിയും എംഎല്എയും പരസ്പരം കൊമ്പുകോര്ത്തത്. നാട്ടുകാരും പൊലീസുകാരും നോക്കി നില്ക്കെയാണ് നാടകീയ സംഭവങ്ങള് അരങ്ങേറിയത്. ഇതിന്റെ വീഡിയോ സോഷ്യല് മീഡിയയില് ഇതിനോടകം വൈറലായിക്കഴിഞ്ഞു.
മേയേറും റിവാബയും തമ്മിലാണ് ആദ്യം തര്ക്കം തുടങ്ങിയത്. പരിപാടിക്കിടെ റിവാബ ഉപയോഗിച്ച ചിലവാക്കുകളില് അതൃപ്തി അറിയിച്ച മേയര് മാന്യമായി സംസാരിക്കണമെന്ന് റിവാബയോട് ആവശ്യപ്പെടുകയായിരുന്നു. എന്നാല് നില മറന്നു പെരുമാറരുതെന്ന് റിവാബ തിരിച്ചടിച്ചതോടെയാണ് തര്ക്കം രൂക്ഷമായത്. ഇരുവരും തമ്മിലുള്ള തര്ക്കം തീര്ക്കാന് ഇടപെട്ടതോടെയാണ് എംപിയോടും റിവാബ തട്ടിക്കയറിയത്.
തര്ക്കത്തിനുശേഷം മൂവരും ഗ്രൂപ്പ് ഫോട്ടോക്ക് പോസ് ചെയ്തശേഷമാണ് മൂവരും മടങ്ങിയത്. ജാംനഗര് നോര്ത്തില് നിന്നുള്ള ബിജെപി എംഎല്എയാണ് റിവാബ.