ഐപിഎല്ലിൽ ഇന്നലെ നടന്ന പോരിൽ ചെന്നൈ സൂപ്പർ കിംഗ്സിനെതിരെ രാജസ്ഥാൻ റോയൽസ് മികച്ച ജയം സ്വന്തമാക്കിയിരുന്നു. ആദ്യം ബാറ്റ് ചെയ്ത ചെന്നൈ ഉയർത്തിയ 188 റൺസ് വിജയലക്ഷ്യം പിന്തുടർന്ന രാജസ്ഥാൻ 17.1 ഓവറിൽ 6 വിക്കറ്റുകൾ ബാക്കി നിർത്തി കളി പിടിച്ചു. ഓപ്പണർമാരായ യശസ്വി ജയ്സ്വാളും വൈഭവ് സൂര്യവൻഷിയും നായകൻ സഞ്ജു സാംസണും മികച്ച പ്രകടനമാണ് പുറത്തെടുത്തത്. 33 പന്തുകൾ നേരിട്ട് 57 റൺസ് നേടിയ 14കാരൻ വൈഭവ് സൂര്യവൻഷിയാണ് ചെന്നൈയെ തകർത്തെറിയുന്നതിൽ നിർണായക പങ്ക് വഹിച്ചത്.
സീസണിൽ അതിദയനീയ പ്രകടനം പുറത്തെടുത്ത് നിലവിൽ പോയിന്റ് പട്ടികയിൽ അവസാന സ്ഥാനക്കാരായ ചെന്നൈ സൂപ്പർ കിങ്സിന് അധികം പോസിറ്റീവുകൾ ഒന്നും സീസണിൽ എടുത്ത് പറയാൻ പോലും ഇല്ല എന്ന് പറയാം. യുവതാരങ്ങളിൽ ചിലർ കാണിച്ച പോരാട്ടവീര്യം മാത്രമാണ് ആകെ ഓർത്തിരിക്കാനുള്ളത്. സീസണിൽ മോശം പ്രകടനത്തിന്റെ കാരണം പരിശോധിച്ചാൽ ഒരുപാട് ഉത്തരം പറയാൻ ഉണ്ടെങ്കിലും ഹർഭജൻ സിങ് പറയുന്നത് രവിചന്ദ്രൻ അശ്വിന്റെ മോശം ഫോം തന്നെയാണ് ടീമിന്റെ മോശം പ്രകടനത്തിന്റെ കാരണം എന്നാണ്.
മെഗാ ലേലത്തിൽ 9 . 75 കോടിക്ക് ചെന്നൈ ഏറെ പ്രതീക്ഷയോടെ ടീമിൽ എത്തിച്ച അശ്വിൻ തന്റെ നല്ല കാലത്തിന്റെ നിഴലിൽ മാത്രമാണ് പന്തെറിഞ്ഞത് എന്ന് പറയാം. ഇന്നലെ രാജസ്ഥാനെതിരെ നടന്ന മത്സരത്തിൽ 2 വിക്കറ്റ് നേടിയെങ്കിലും നല്ല രീതിയിൽ പ്രഹരം ഏറ്റുവാങ്ങിയിരുന്നു. ഇതുമായി ബന്ധപ്പെട്ട് ഹർഭജന്റെ വാക്കുകൾ ഇങ്ങനെ: “അശ്വിൻ പന്ത് സ്പിൻ ചെയ്യാൻ നോക്കുന്നില്ല. വിക്കറ്റുകൾ വീഴ്ത്താൻ താത്പര്യമില്ലാത്ത മട്ടിലാണ് അവൻ പന്തെറിയുന്നത്. അയാൾ കാരം ബോളിനെ മാത്രമാണ് ആശ്രയിക്കുന്നത്, പന്ത് സ്പിൻ ചെയ്യാൻ നോക്കുന്നില്ല,” അദ്ദേഹം പറഞ്ഞു.
“അദ്ദേഹം ഓഫ് സ്പിൻ എറിയണമായിരുന്നു. പക്ഷേ 20 വർഷമായി താൻ മികവ് കാണിക്കാൻ ഇടയായ ഓഫ് സ്പിന്നുമായി മുന്നോട്ട് പോകാൻ അദ്ദേഹത്തിന് താൽപ്പര്യമില്ല. കാരം ബോൾ ഒകെ അവൻ അടുത്തിടെ പഠിച്ചതാണ്. പുതിയ ഒരു വിദ്യ പഠിച്ചപ്പോൾ അവൻ പഴയത് മറക്കാൻ പാടില്ലായിരുന്നു” അദ്ദേഹം കൂട്ടിച്ചേർത്തു.
എന്തായാലും മോശം ഫോം കാരണം തന്നെ മിനി ലേലത്തിന് മുമ്പ് ചെന്നൈ അദ്ദേഹത്തെ റിലീസ് ചെയ്യാൻ സാധ്യതയുണ്ട്.