ഐപിഎല്ലിലെ പുതിയ ടീമുകളായ ലക്നൗവും അഹമ്മദാബാദും നായകന്മാരെ ഉറപ്പിച്ചതായി റിപ്പോര്ട്ടുകള്. ലക്നൗ കെ.എല്. രാഹുലിനെയും അഹമ്മദാബാദ് ഹാര്ദിക് പാണ്ഡ്യയേയും തങ്ങളുടെ ടീമിന്റെ നായകന്മാരായി തീരുമാനിച്ചതായാണ് റിപ്പോര്ട്ട്.
അഹമ്മദാബാദ് റാഷിദ് ഖാനെയും ശുഭ്മാന് ഗില്ലിനെയും തങ്ങളുടെ ഭാഗമാക്കിയതായും റിപ്പോര്ട്ടുകളുണ്ട്. അതേസമയം, ഏവരും ഉറ്റുനോക്കുന്ന സൂപ്പര് താരം ശ്രേയസ് അയ്യര് ലേലക്കളത്തിലേക്ക് എത്തുമെന്ന് ഉറപ്പായി.
പുതിയ ടീമുകള് നായകസ്ഥാനം ഓഫര് ചെയ്യാത്ത സാഹചര്യത്തിലാണ് ശ്രേയസ് മെഗാലേലത്തിന്റെ ഭാഗമാകുന്നതെന്നാണ് വിവരം. ഇരുടീുകളുടെയും വമ്പന് ഓഫറുകള് വേണ്ടെന്നുവെച്ചാണ് താരം ലേലക്കളത്തിലേക്ക് വരുന്നത്.
ക്യാപ്റ്റന് സ്ഥാനത്തേക്ക് ആളെ തേടുന്ന കൊല്ക്കത്ത നൈറ്റ് റൈഡേഴ്സ്, പഞ്ചാബ് കിംഗ്സ് ടീമുകള് ശ്രേയസിനെ നോട്ടമിട്ടിട്ടുണ്ട്. ആര്സിബിയ്ക്കും ശ്രേയസില് ഒരു കണ്ണുണ്ട്. എന്തായാലും മെഗാലേലത്തില് താരത്തിനായി കനത്ത പോരാട്ടം നടക്കുമെന്ന് ഉറപ്പായി.