ഐ.പി.എല്‍ കൊടിയേറ്റത്തിന് രണ്ട് ദിവസം മാത്രം ശേഷിക്കെ റോയല്‍ ചാലഞ്ചേഴ്‌സ് ബാംഗ്ലൂരിന്റെ ഓസ്‌ട്രേലിയന്‍ ഓള്‍റൗണ്ടര്‍ ഡാനിയല്‍ സാംസിന് കോവിഡ് സ്ഥിരീകരിച്ചു. റോയല്‍ ചലഞ്ചേഴ്‌സ് തന്നെയാണ് ഇക്കാര്യം പുറത്തു വിട്ടത്. ബാംഗ്ലൂര്‍ നിരയില്‍ കോവിഡ് ബാധിതനാകുന്ന രണ്ടാമത്തെ താരമാണ് സാംസ്. നേരത്തെ മലയാളി താരം ദേവ്ദത്ത് പടിക്കലിനും കോവിഡ് സ്ഥിരീകരിച്ചിരുന്നു.
കോവിഡ് സ്ഥിരീകരിച്ചതോടെ താരത്തെ ഐസലേഷനിലേക്ക് മാറ്റി. താരത്തിന് രോഗലക്ഷണങ്ങളില്ലെന്നാണ് റിപ്പോര്‍ട്ട്. പുതിയ സീസണായി ഏപ്രില്‍ മൂന്നിനാണ് സാംസ് ബാംഗ്ലൂര്‍ ടീമിനൊപ്പം ചേര്‍ന്നത്. ഐ.പി.എല്‍ ചട്ടമനുസരിച്ച് വീണ്ടും നടത്തിയ പരിശോധനയിലാണ് താരത്തിന് വൈറസ് ബാധ സ്ഥിരീകരിച്ചത്.
നേരത്തെ ഡല്‍ഹി താരം അക്ഷര്‍ പട്ടേല്‍, കൊല്‍ക്കത്ത നൈറ്റ് റൈഡേഴ്‌സ് താരം നിതീഷ് റാണ എന്നിവര്‍ക്കും കോവിഡ് സ്ഥിരീകരിച്ചിരുന്നു. ഇതിനു പുറമെ മുംബൈ ഇന്ത്യന്‍സിന്റെ വിക്കറ്റ് കീപ്പിംഗ് കണ്‍സല്‍ട്ടന്റും സ്‌കൗട്ടും മുന്‍ ഇന്ത്യന്‍ താരവുമായ കിരണ്‍ മോറെയും കോവിഡ് പോസിറ്റീവായി.
ഏപ്രില്‍ 9 നാണ് ഐ.പി.എല്ലിന് തുടക്കമാകുന്നത്. ഉദ്ഘാടന മത്സരത്തില്‍ നിലവിലെ ചാമ്പ്യന്‍മാരായ മുംബൈ ഇന്ത്യന്‍സ് റോയല്‍ ചാലഞ്ചേഴ്‌സ് ബാംഗ്ലൂരിനെ നേരിടും. ചെന്നൈയാണ് ഉദ്ഘാടന മത്സരത്തിന് വേദിയാകുന്നത്.