ശുഭ്മാൻ ഗില്ലിനെ ടെസ്റ്റ് ക്യാപ്റ്റനാക്കുന്നതിൽ തന്റെ മകൻ യുവരാജ് സിംഗ് വലിയ പങ്കുവഹിച്ചിട്ടുണ്ടെന്ന് മുൻ ഇന്ത്യൻ ക്രിക്കറ്റ് താരം യോഗ്രാജ് സിംഗ്. 2025-27 ലെ ലോക ടെസ്റ്റ് ചാമ്പ്യൻഷിപ്പിന്റെ (ഡബ്ല്യുടിസി) ഭാഗമായി നിർണായകമായ ഇംഗ്ലണ്ട് പര്യടനത്തിന് മുമ്പ് രോഹിത് ശർമ്മയുടെ പിൻഗാമിയായി ഗിൽ ഇന്നലെ ടെസ്റ്റ് ടീം നായകനായി തിരഞ്ഞെടുക്കപ്പെട്ടു.
പഞ്ചാബിനു വേണ്ടിയാണ് യുവരാജ് സിംഗ് കളിക്കുന്നത് എന്നതിനാൽ, യുവരാജ് സിംഗ് ശുഭ്മാൻ ഗില്ലിന് തന്റെ ആദ്യകാലം മുതൽ തന്നെ മാർഗനിർദേശം നൽകിവരുന്നു. യുവരാജിന്റെ വഴിത്തിരിവായ ആഭ്യന്തര ടീമായ പഞ്ചാബിനാണ് ഗില്ലും കളിക്കുന്നത്. ഫോർമാറ്റുകളിലുടനീളം ഗില്ലിന്റെ പ്രകടനം മികച്ചത് ആണെന്നും അതിന് അയാളെ യുവി സഹായിച്ചെന്നും യോഗ്രാജ് പറഞ്ഞു.
“ഗില്ലിന്റെ പ്രകടനത്തിന്റെ ക്രെഡിറ്റ് അദ്ദേഹത്തിന്റെ പിതാവിനും യുവരാജ് സിംഗിനുമാണ്. ശുഭ്മാൻ ഗിൽ ഇന്ന് ഇന്ത്യൻ നായകൻ ആയിട്ട് ഉണ്ടെങ്കിൽ അതിൽ യുവി വഹിച്ച പങ്ക് വലുതാണ്. ലോകത്തിലെ ഏറ്റവും മികച്ച ക്രിക്കറ്റ് ബ്രെയിനായ യുവരാജ് സിംഗിനെപ്പോലുള്ള ഒരാൾ, ഗില്ലിനെ സഹായിക്കാൻ ഇറങ്ങുന്നത് വലിയ കാര്യമാണ്.” യോഗ്രാജ് സിംഗ് ANI യോട് പറഞ്ഞു.
ഋഷഭ് പന്ത് ഉപനായകൻ ആയ ടീമിൽ യുവതാരങ്ങൾക്ക് പ്രാധാന്യം നൽകിയിട്ടുണ്ട്. രവിചന്ദ്രൻ അശ്വിൻ, രോഹിത് ശർമ്മ, വിരാട് കോഹ്ലി എന്നിവരുടെ വിരമിക്കലിനുശേഷം ഇന്ത്യൻ ടീമിനെ മുന്നോട്ട് കൊണ്ടുപോകുക എന്ന ഉത്തരവാദിത്വം ഗില്ലിന് മുന്നിൽ ഉണ്ട്.