ഇന്ത്യയും ന്യൂസിലാന്റും തമ്മിലുള്ള മൂന്ന് മത്സരങ്ങളുടെ ടി20 പരമ്പരയിലെ രണ്ടാമത്തെ മല്‍സരം ഇന്ന് റാഞ്ചിയില്‍ നടക്കും. രാത്രി ഏഴു മണിക്കാണ് കളിയാരംഭിക്കുന്നത്. ജയ്പൂരില്‍ ബുധനാഴ്ച നടന്ന ആദ്യ കളിയില്‍ അഞ്ചു വിക്കറ്റിന്റെ വിജയം സ്വന്തമാക്കിയ ഇന്ത്യ ജയത്തിലൂടെ പരമ്പര സ്വന്തമാക്കാനാണ് ഇന്ന് ഇറങ്ങുന്നത്.
ആദ്യ മത്സരത്തിനിറങ്ങിയ ടീമില്‍ ഇന്ത്യ ഏതാനും മാറ്റങ്ങല്‍ വരുത്തുമെന്ന് ഉറപ്പാണ്. കഴിഞ്ഞ കളിയില്‍ ബോളിംഗിനിടെ കൈവിരലിനു പരിക്കേറ്റ ഫാസ്റ്റ് ബോളര്‍ മുഹമ്മദ് സിറാജിനു ഇന്ത്യ വിശ്രമം നല്‍കിയേക്കും. പകരം ഹര്‍ഷല്‍ പട്ടേല്‍, ആവേശ് ഖാന്‍ എന്നിവരിലൊരാള്‍ക്ക് നറുക്കുവീഴും.
ആദ്യ മല്‍സരത്തില്‍ പുറത്തിരുന്ന ഇഷാന് കിഷനും യുസ്‌വേന്ദ്ര ചഹലിനും ഇന്നത്തെ മത്സരത്തില്‍ അവസരം ലഭിക്കുമോയെന്ന് കണ്ട് തന്നെ അറിയണം. എന്നിരുന്നാലും ചഹലിന് അവസരം ലഭിച്ചാലും ഇഷാന് ഇടംലഭിക്കാന്‍ സാധ്യത കുറവാണ്. ഇഷാന്റെ ഹോം ഗ്രൗണ്ടാണ് റാഞ്ചി.
ടി20 പരമ്പരയില്‍ കളിക്കാരുടെ ജോലിഭാരം കുറയ്ക്കുന്നതിനായി മൂന്നു വ്യത്യസ്ത ക്യാപ്റ്റന്‍മാരെ ന്യൂസിലാന്റ് പരീക്ഷിച്ചേക്കുമെന്ന് റിപ്പോര്‍ട്ടുകളുണ്ട്. കെയ്ന്‍ വില്ല്യംസണിന്റെ അഭാവത്തില്‍ ടിം സൗത്തിയായിരുന്നു ആദ്യ ടി20യില്‍ ടീമിനെ നയിച്ചത്. റാഞ്ചിയില്‍ ടീമിലെ മറ്റൊരു സ്റ്റാര്‍ പേസറായിട്ടുള്ള ട്രെന്റ് ബോള്‍ട്ട് നായകനായേക്കും.
ഇന്ത്യ സാധ്യതാ ഇലവന്‍: രോഹിത് ശര്‍മ, കെഎല്‍ രാഹുല്‍, സൂര്യകുമാര്‍ യാദവ്, ശ്രേയസ് അയ്യര്‍, റിഷഭ് പന്ത്, വെങ്കടേഷ്് അയ്യര്‍, ആര്‍ അശ്വിന്‍, അക്ഷര്‍ പട്ടേല്‍/ യുസ്‌വേന്ദ്ര ചഹല്‍, ഭുവനേശ്വര്‍ കുമാര്‍, ദീപക് ചാഹര്‍, ഹര്‍ഷല്‍ പട്ടേല്‍/ആവേശ് ഖാന്‍.