ഇടത് കാൽമുട്ടിന് പരിക്കേറ്റതിനെ തുടർന്ന് ഇന്ത്യൻ ഓൾറൗണ്ടർ നിതീഷ് കുമാർ റെഡ്ഡി ഇംഗ്ലണ്ടിനെതിരായ പരമ്പരയിലെ ശേഷിക്കുന്ന മത്സരങ്ങളിൽ നിന്ന് പുറത്തായി. കൂടുതൽ വിലയിരുത്തലിനും ചികിത്സയ്ക്കുമായി അദ്ദേഹം ഇന്ത്യയിലേക്ക് മടങ്ങും.
കൂടാതെ, നെറ്റ് സെഷനിൽ ബോൾ ചെയ്യുന്നതിനിടെ ഇടതു തള്ളവിരലിന് പരിക്കേറ്റതിനാൽ ജൂലൈ 23 മുതൽ മാഞ്ചസ്റ്ററിൽ ആരംഭിക്കുന്ന വരാനിരിക്കുന്ന നാലാം ടെസ്റ്റിൽ നിന്ന് ഇടംകൈയ്യൻ പേസർ അർഷ്ദീപിനെ ഒഴിവാക്കി. പകരം അൻഷുൽ കാംബോജിനെ ടീമിലുൾപ്പെടുത്തി. നിതീഷ് തുടർ ചികിത്സയ്ക്കായി നാട്ടിലേക്ക് മടങ്ങുമ്പോൾ, ബിസിസിഐയുടെ മെഡിക്കൽ ടീം അർഷ്ദീപിന്റെ ആരോഗ്യസ്ഥിതി നിരീക്ഷിക്കും.
“ഇടത് കാൽമുട്ടിനേറ്റ പരിക്കിനെത്തുടർന്ന് ഓൾറൗണ്ടർ നിതീഷ് കുമാർ റെഡ്ഡി ശേഷിക്കുന്ന രണ്ട് ടെസ്റ്റുകളിൽ നിന്ന് പുറത്തായി. നിതീഷ് നാട്ടിലേക്ക് മടങ്ങും, ടീം അദ്ദേഹത്തിന് വേഗത്തിൽ സുഖം പ്രാപിക്കട്ടെ എന്ന് ആശംസിക്കുന്നു,” ബിസിസിഐ പുറത്തിറക്കിയ പ്രസ്താവനയിൽ പറഞ്ഞു.
“ഇംഗ്ലണ്ടിനെതിരെ മാഞ്ചസ്റ്ററിൽ നടക്കുന്ന നാലാം ടെസ്റ്റിൽ അർഷ്ദീപ് സിംഗിനെ ഒഴിവാക്കി. ബെക്കൻഹാമിൽ പരിശീലന സെഷനിൽ നെറ്റ്സിൽ പന്തെറിയുന്നതിനിടെ താരത്തിന്റെ ഇടതു തള്ളവിരലിന് പരിക്കേറ്റു. ബിസിസിഐ മെഡിക്കൽ ടീം അദ്ദേഹത്തിന്റെ പുരോഗതി നിരീക്ഷിച്ചുകൊണ്ടിരിക്കുകയാണ്,” പ്രസ്താവനയിൽ കൂട്ടിച്ചേർത്തു.
പരമ്പരയിൽ ഇന്ത്യ നിലവിൽ 2-1 ന് പിന്നിലാണ്. ഹെഡിംഗ്ലിയിൽ നടന്ന പരമ്പരയിലെ ആദ്യ മത്സരത്തിൽ ആതിഥേയർ അഞ്ച് വിക്കറ്റിന് വിജയിച്ചു. രണ്ടാം മത്സരത്തിൽ ഇന്ത്യ മികച്ച പ്രകടനം കാഴ്ചവച്ചു, എഡ്ജ്ബാസ്റ്റണിൽ 336 റൺസിന്റെ ഐതിഹാസിക വിജയം നേടി. എന്നിരുന്നാലും, ലോർഡ്സിൽ 22 റൺസിന് തോറ്റു. ഓൾഡ് ട്രാഫോർഡിൽ പരമ്പര സമനിലയിലാക്കുക എന്നതാണ് സന്ദർശകരുടെ ലക്ഷ്യം. ജൂലൈ 23 ബുധനാഴ്ച നാലാമത്തെ ടെസ്റ്റ് ആരംഭിക്കും.