ഇന്ത്യന്‍ പേസര്‍ ജസ്പ്രീത് ബുംറയുടെ ബോളിംഗിനെ എതിരാളികള്‍ പോലും പ്രശംസിക്കും. എന്നാല്‍ ബുംറയുടെ ബാറ്റിംഗും ഇപ്പോള്‍ അഭിനന്ദനത്തിന് അര്‍ഹമായിരിക്കുകയാണ്. മറ്റാരുമല്ല, ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കറെയാണ് ബുംറ ബാറ്റുകൊണ്ട് അത്ഭുതപ്പെടുത്തിയിരിക്കുന്നത്. ഇംഗ്ലണ്ടിനെതിരായ ഒന്നാം ക്രിക്കറ്റ് ടെസ്റ്റില്‍ 28 റണ്‍സ് നേടിയ ബുംറ ഇന്ത്യക്ക് നിര്‍ണായക സംഭാവന നല്‍കിയിരുന്നു.
വാലറ്റക്കാര്‍ പ്രധാനപ്പെട്ട കുറച്ച് റണ്‍സ് കൂട്ടിച്ചേര്‍ത്തതോടെ മികച്ച ലീഡാണ് ഇന്ത്യക്ക് ലഭിച്ചത്. പിന്നിലായശേഷം ഇംഗ്ലണ്ട് എങ്ങനെ പ്രതികരിക്കുമെന്നത് കൗതുകരമായിരിക്കും. മറ്റൊരു കാര്യം പറഞ്ഞാല്‍, ജസ്പ്രീത് ബുംറ തന്റെ ജീവിതത്തിലെ തന്നെ മികച്ച ഷോട്ടാണ് കളിച്ചത്- സച്ചിന്‍ ട്വീറ്റ് ചെയ്തു.
34 പന്തുകള്‍ നേരിട്ട ബുംറ മൂന്ന് ഫോറും ഒരു സിക്സും പറത്തിയിരുന്നു. എന്നാല്‍ ബുംറയുടെ ഏത് ഷോട്ടാണ് തന്നെ ആകര്‍ഷിച്ചതെന്ന് സച്ചിന്‍ തെളിച്ചുപറഞ്ഞിട്ടില്ല. സാം കറന്റെ പന്തില്‍ നേടിയ സിക്സാണ് സച്ചിന്‍ ഉദ്ദേശിച്ചതെന്ന് കരുതപ്പെടുന്നു. ടെസ്റ്റില്‍ തന്റെ ഉയര്‍ന്ന വ്യക്തിഗത സ്‌കോറാണ് ബുംറ ഇന്നലെ നേടിയത്. ബാറ്റുകൊണ്ട് ബുംറ വിരുതുകാട്ടുന്നത് ഇതാദ്യമല്ല. കഴിഞ്ഞ വര്‍ഷം ഓസ്ട്രേലിയന്‍ പര്യടനത്തിനിടെ ഓസിസ് എ ടീമിനെതിരെ ബുംറ അര്‍ദ്ധ ശതകം നേടിയിരുന്നു.