ഇപ്പോൾ നടക്കുന്ന ഐപിഎലിൽ മികച്ച തുടക്കം ലഭിക്കാത്ത ടീമുകളിൽ ഒന്നാണ് ചെന്നൈ സൂപ്പർ കിങ്സ്. മലയാളി താരം സഞ്ജു സാംസൺ അടക്കം മികച്ച താരങ്ങളുള്ള ടീമാണ് ചെന്നൈ. എന്നാൽ ഐപിഎലിൽ ഇത് വരെയായി രണ്ട് മത്സരങ്ങൾ മാത്രമാണ് ടീമിന് വിജയിക്കാൻ സാധിച്ചത്. നായകനായ റുതുരാജ് ഗെയ്ക്വാദിന്റെ മോശമായ ബാറ്റിംഗ് പ്രകടനവും ക്യാപ്റ്റൻസിയുമാണ് ടീം തോല്കുന്നതിന്റെ പ്രധാന കാരണമായി ആരാധകർ വിലയിരുത്തുന്നത്.
ഇപ്പോഴിതാ ചെന്നൈ സൂപ്പർ കിംഗ്സിനെ ഭാവിയിൽ മലയാളി താരം സഞ്ജു സാംസൺ നയിച്ചേക്കുമെന്ന് മുൻ താരം രവിചന്ദ്രൻ അശ്വിൻ. ഇതിഹാസതാരം എംഎസ് ധോണിക്ക് ശേഷം എത്തിയ ക്യാപ്റ്റൻ റുതുരാജ് ഗെയ്ക്വാദ് നായകനെന്ന നിലയിലും ബാറ്ററെന്ന നിലയിലും പരാജയപ്പെടുന്ന സാഹചര്യത്തിലാണ് അശ്വിന്റെ നിർണായക പ്രതികരണം.
‘ഞാൻ ഒരു ജ്യോതിഷിയല്ല. പക്ഷെ ഇങ്ങനെ പോയാൽ സഞ്ജു സാംസൺ സിഎസ്കെയുടെ ക്യാപ്റ്റനാകുമെന്ന് ഞാൻ കാണുന്നുണ്ട്. അത് എന്നായിരിക്കും എന്ന് പറയാൻ കഴിയില്ല, പക്ഷേ അങ്ങനെ സംഭവിക്കുമെന്ന് ഉറപ്പാണ്. എന്നാൽ സഞ്ജുവിന്റെ കാര്യത്തിൽ എനിക്ക് ആഗ്രഹമില്ലാത്ത ഒരേയൊരു കാര്യം, അവൻ മറ്റൊരാൾക്ക് പകരമായിട്ട് വരിക എന്നതാണ്’ രവി അശ്വിൻ പറഞ്ഞു.