ഇന്ത്യ-പാകിസ്ഥാന് സംഘര്ഷത്തെ തുടര്ന്ന് ഐപിഎല് മത്സരങ്ങള് അനിശ്ചിത കാലത്തേക്ക് നിര്ത്തിവച്ചിരിക്കുകയാണ് ബിസിസിഐ. ഒരാഴ്ചയ്ക്ക് ശേഷം നിലവിലെ സാഹചര്യം വിലയിരുത്തി ബാക്കിയുളള മത്സരങ്ങള് എന്ന് നടത്താനാവുമെന്ന് അറിയിക്കാമെന്നായിരുന്നു അധികൃതര് പറഞ്ഞത്. എന്നാല് ഇന്ത്യയില്വച്ച് പെട്ടെന്ന് നടത്താനുളള സാധ്യതകള് കുറവായതിനാല് മറ്റു രാജ്യങ്ങളില് ഏതെങ്കിലും ഒരു സ്ഥലം ഐപിഎല് വേദിയാകുമായെന്നാണ് ആരാധകര് ഉറ്റുനോക്കുന്നത്. ഇന്നലെയാണ് മുന്താരം മൈക്കല് വോണ് ഐപിഎല് നടത്താന് ഇംഗ്ലണ്ട് നല്ല വേദിയാണെന്ന് തുറന്നുപറഞ്ഞത്.
അവിടത്തെ സ്റ്റേഡിയങ്ങള് ഇതിന് പൂര്ണ്ണ സജ്ജമാണെന്നും എപ്പോള് വേണമെങ്കിലും ഐപിഎല് മത്സരങ്ങള് നടത്താമെന്നുമാണ് വോണ് പറഞ്ഞത്. ഐപിഎലിന് ശേഷം ഇന്ത്യന് താരങ്ങള്ക്ക് ഇംഗ്ലണ്ടില് തന്നെ തുടര്ന്ന് ടെസ്റ്റ് പരമ്പരയ്ക്കായി ഒരുങ്ങാമെന്നും വോണ് നിര്ദേശിച്ചു. അതേസമയം മൈക്കല് വോണിനെ ട്രോളി ഐസ്ലന്ഡ് ക്രിക്കറ്റിന്റെതായി വന്ന പോസ്റ്റ് സോഷ്യല് മീഡിയയില് നിറയുകയാണ്. 24 മണിക്കൂറും ഐസ്ലന്ഡില് പകല്വെളിച്ചമുണ്ടെന്നും ഫ്ളഡ് ലൈറ്റ് തകരാറുകള് ഉണ്ടാവില്ലെന്നുമാണ് അവര് കുറിച്ചത്.
‘ഇവിടെ ഐസ്ലാന്ഡ് മാത്രമാണ് ഏക പോംവഴി. ഞങ്ങള്ക്ക് ഏകദേശം 24 മണിക്കൂര് പകല് വെളിച്ചമുണ്ട്, അതിനാല് ഫ്ളഡ്ലൈറ്റ് തകരാറുകള് ഒരു പ്രശ്നവുമല്ലെന്ന് ഉറപ്പാക്കുന്നു’, അവര് പോസ്റ്റ് ചെയ്തു. അതേസമയം ഐപിഎലില് ബാക്കിയുളള മത്സരങ്ങള് അടുത്ത സെപ്റ്റംബറില് നടത്തുമെന്നും റിപ്പോര്ട്ടുകളുണ്ടായിരുന്നു. എഷ്യാകപ്പ് ഷെഡ്യൂള് ചെയ്ത ഈ സമയത്ത് ഇന്ത്യയും പാകിസ്ഥാനും ടൂര്ണമെന്റില് പങ്കെടുക്കാനുളള സാധ്യത കുറവാണ്. ആയതിനാല് സെപ്റ്റംബറില് ഐപിഎല് മത്സരങ്ങള് ബിസിസിഐ നടത്തിയേക്കും. എന്നാല് ഇതുസംബന്ധിച്ചുളള ഔദ്യോഗിക സ്ഥിരീകരണമൊന്നും നടന്നിട്ടില്ല.