ഐപിഎലിൽ ഇന്നലെ നടന്ന മത്സരത്തിൽ കരുത്തരായ റോയൽ ചലഞ്ചേഴ്സ് ബെംഗളുരുവിനെ തകർത്ത് പ്ലെ ഓഫ് സാധ്യതകൾ നിലനിർത്തി ഗുജറാത്ത് ടൈറ്റൻസ്. 4 വിക്കറ്റുകൾക്കാണ് ആർസിബിയെ ഗുജറാത്ത് തോല്പിച്ചത്. ഗുജറാത്തിനായി ക്യാപ്റ്റൻ ശുഭ്മൻ ഗിൽ മികച്ച ബാറ്റിംഗ് പ്രകടനം കാഴ്ച വെച്ചു.
ക്യാപ്റ്റൻ ശുഭ്മൻ ഗിൽ 18 പന്തിൽ മൂന്ന് സിക്സറും നാല് ഫോറുകളും അടക്കം 43 റൺസ് നേടി. ജോസ് ബട്ട്ലർ 19 പന്തിൽ നാല് സിക്സറും രണ്ട് ഫോറുകളും അടക്കം 39 റൺസ് നേടി. രാഹുൽ തിവാറ്റിയ 27 റൺസും നേടി. നേരത്തെ ടോസ് നഷ്ടമായി ബാറ്റിങ്ങിനിറങ്ങിയ ആർസിബി 19 .2 ഓവറിൽ 155 റൺസിൽ ഓൾ ഔട്ടാവുകയായിരുന്നു. 24 പന്തിൽ രണ്ട് സിക്സറും അഞ്ച് ഫോറുകളും അടക്കം 40 റൺസ് നേടിയ ദേവ്ദത്ത് പടിക്കലാണ് ടോപ് സ്കോറർ. മത്സരശേഷം ശുഭ്മൻ ഗിൽ സംസാരിച്ചു.
‘ഇന്ന് എന്റെ ദിവസമാണെന്ന് എനിക്ക് തോന്നി, കൂടാതെ അവരുടെ ബോളർമാരെയും നേരിടാൻ ഞാൻ ആഗ്രഹിച്ചു. ടീമിൽ രാഹുൽ മികച്ച പ്രകടനം നടത്തി. ഞങ്ങളുടെ പ്രധാനപ്പെട്ട താരമാണ് അദ്ദേഹം. അവൻ മത്സരം ഫിനിഷ് ചെയ്തതിൽ ഒരുപാട് സന്തോഷം. മത്സരത്തിൽ ഞങ്ങൾക്ക് കുറച്ച് വിക്കറ്റുകൾ നഷ്ടമായി. പക്ഷെ അവൻ നന്നായി റൺസ് നേടി’ ശുഭ്മൻ ഗില് പറഞ്ഞു.