ഇന്ത്യന് ടീമിലെ സ്ഥാനത്തിനെക്കുറിച്ച് തനിക്കു യാതൊരു ആശങ്കയുമില്ലെന്ന ശര്ദുല് താക്കൂര്. ടീമില് സ്ഥാനം നിലനിര്ത്തുന്നതിനു വേണ്ടി താന് കരിയറില് ഇതുവരെ കളിച്ചിട്ടില്ലെന്നും അത്തരത്തില് കളിക്കുന്ന താരങ്ങളുടെ നിരയില് തന്നെ പെടുത്തേണ്ടന്നും താക്കൂര് പറഞ്ഞു.
അവസരം ലഭിച്ചപ്പോഴെല്ലാം ടീമിന്റെ വിജയത്തിനു വേണ്ടി സംഭാവന ചെയ്യാനാണ് ഞാന് ശ്രമിച്ചിട്ടുള്ളത്. ഞാന് ചിന്തിക്കുന്നത് ആ തരത്തിലാണ്. ബാറ്റിംഗോ ബോളിംഗോ ഫീല്ഡിംഗോ ആവട്ടെ ഞാന് ഏറ്റവും നന്നായി പെര്ഫോം ചെയ്യാനാണ് എല്ലായ്പ്പോഴും ശ്രമിക്കുന്നത്.
ടീമിലെ സ്ഥാനത്തിനു വേണ്ടി കളിക്കുന്ന താരങ്ങളുടെ നിരയില് എന്നെ പെടുത്തേണ്ട. അങ്ങനെയൊരു ചിന്തയോടെ ഇറങ്ങിയാല് എനിക്കു കളിക്കാന് സാധിക്കില്ല. വരാനിരിക്കുന്ന ഏകദിന ലോകകപ്പിനുള്ള ടീമില് എന്നെ ഉള്പ്പെടുത്തുന്നില്ലെങ്കില് അതു ടീം മാനേജ്മെന്റിന്റെ കോളാണ്. എനിക്കു അതില് കാര്യമായൊന്നും ചെയ്യാന് സാധിക്കില്ല.
ഞാന് ടീമിലെ സ്ഥാനത്തിനു വേണ്ടി കളിക്കണമെന്നു ചിന്തിക്കുകയാണെങ്കില് അതു തെറ്റായിരിക്കും. ഞാന് എന്റെ ജോലി ചെയ്യുന്നു, അതിനു ശേഷം ടീം വിടുകയുമാണ് ചെയ്യുന്നത്.
വ്യക്തിപരമായി എനിക്കു നേട്ടങ്ങളുണ്ടാവുമോ, ഇല്ലയോ എന്ന് ഞാനൊരിക്കലും നോക്കിയിട്ടില്ല. എന്തൊക്കെ സംഭവിച്ചാലും ഞാന് ടീമിനായി കളിക്കാന് ശ്രമിക്കുകയും ഇംപാക്ടുണ്ടാക്കാന് ശ്രമിക്കുകയും ചെയ്യും- താക്കൂര് പറഞ്ഞു.