ദക്ഷിണാഫ്രിക്കയ്ക്ക് എതിരായ ടെസ്റ്റ് പരമ്പരയ്ക്ക് പിന്നാലെ ഏകദിന പരമ്പരയും നഷ്ടമായ രോഹിത് ശര്‍മക്ക് ട്രോള്‍ മഴ. പരിക്കിന്റെ പിടിലായിരുന്ന താരം ഫിറ്റ്നസ് വീണ്ടെടുക്കുന്നതില്‍ പരാജയപ്പെട്ടതോടെയാണ് ടീമിന് പുറത്തായത്. സമീപകാലത്തായി രോഹിത്തിന്റെ തടി കൂടുന്നുണ്ടെന്നും ഫിറ്റ്നസില്‍ ശ്രദ്ധയില്ലാത്തതുമാണ് പരിക്കിന്റെ കാരണമെന്നാണ് ആരാധകര്‍ ചൂണ്ടിക്കാട്ടുന്നത്.
തടികുറയ്ക്കൂ, വയറ് കുറക്കൂ, അല്ലാന്നുണ്ടെങ്കില്‍ വിരമിച്ച് വീട്ടിലിരിക്കു എന്നൊക്കെയാണ് രോഹിത്തിനോട് ആരാധകര്‍ ആവശ്യപ്പെടുന്നത്. ഏകദിന നായകനായി നിയമിച്ച ശേഷമുള്ള ആദ്യ പരമ്പര തന്നെ നഷ്ടമായ രോഹിത്തിന് 2023ല്‍ നടക്കുന്ന ഏകദിന ലോക കപ്പില്‍ ഇന്ത്യയെ നയിക്കാന്‍ സാധിക്കുമോയെന്ന ആശങ്കയും ആരാധകര്‍ പങ്കുവെക്കുന്നു
ആദ്യ ഘട്ട ഫിറ്റ്നസ് ടെസ്റ്റ് രോഹിത് പാസായെങ്കിലും അവസാന ഘട്ട ടെസ്റ്റുകളില്‍ പരാജയപ്പെടുകയായിരുന്നു. ദേശീയ ക്രിക്കറ്റ് അക്കാദമിക്ക് കീഴിലാണ് രോഹിത്തിന്റെ ഫിറ്റ്നസ് പ്രവര്‍ത്തനങ്ങള്‍ നടന്നക്കുന്നത്. രോഹിത്തിന് പുറമേ രവീന്ദ്ര ജഡേജയും അക്ഷര്‍ പട്ടേലും പരിക്കിനെത്തുടര്‍ന്ന് പരമ്പരക്കില്ല.
ദക്ഷിണാഫ്രിക്കയ്‌ക്കെതിരായ ഏകദിന പരമ്പരയ്ക്കുള്ള ഇന്ത്യന്‍ ടീമിനെ ഇന്നലെ പ്രഖ്യാപിച്ചിരുന്നു. രോഹിത്തിന്റെ ആഭാവത്തില്‍ കെ.എല്‍ രാഹുലാണ് ടീമിന്റെ നായകന്‍. ജസ്പ്രീത് ബുംറയാണ് വൈസ് ക്യാപ്റ്റന്‍. ഏറെ നാളുകള്‍ക്ക് ശേഷം ശിഖര്‍ ധവാന്‍ ഏകദിന ടീമിലേക്ക് മടങ്ങിയെത്തി. ഋതുരാജ് ഗെയ്ക്വാദ്, വെങ്കടേഷ് അയ്യര്‍ എന്നിവര്‍ക്കും ടീമിലേക്ക് വിളിയെത്തി.