മാഞ്ചസ്റ്റര് ടെസ്റ്റ് ഉപേക്ഷിക്കേണ്ടിവന്നതിലെ നീരസം ഇന്ത്യയോട് തുറന്നു പറഞ്ഞ് ഇംഗ്ലണ്ട് ആന്ഡ് വെയ്ല്സ് ക്രിക്കറ്റ് ബോര്ഡ് (ഇസിബി). കോവിഡ് കാരണമല്ല അഞ്ചാം ടെസ്റ്റ് വേണ്ടെന്നുവച്ചതെന്നും ഇന്ത്യന് കളിക്കാരുടെ ഉത്കണ്ഠയാണ് പ്രശ്നമായതെന്നും ഇസിബി സിഇഒ ടോം ഹാരിസണ് പറഞ്ഞു.
ക്രിക്കറ്റിനെ സംബന്ധിച്ച് ദു: ഖകരമായ ദിവസമാണിന്ന്. ആരാധകരോടൊപ്പമാണ് എന്റെ മനസ്. നമ്മള് പൂര്ണമായി തകര്ന്നുപോയി. അന്താരാഷ്ട്ര തലത്തില് തന്നെ വലിയ തോതില് കാഴ്ചക്കാരെ ലഭിക്കുന്ന കളിയാണ് ഉപേക്ഷിക്കേണ്ടിവന്നത്- ടോം ഹാരിസണ് പറഞ്ഞു.
കോവിഡ് വ്യാപനമൊന്നുമില്ലായിരുന്നു. ഇന്ത്യന് കോച്ചിംഗ് സ്റ്റാഫ് കോവിഡ് പോസിറ്റീവായതിന് പിന്നാലെയുണ്ടായ താരങ്ങളുടെ ആകാംഷയായിരുന്നു പ്രശ്നം. എന്താണ് സംഭവിക്കാന് പോകുന്നുവെന്നതില് ഇന്ത്യന് കളിക്കാര് ഉത്കണ്ഠാകുലരായിരുന്നു. സുരക്ഷ സംബന്ധിച്ച് പല തരത്തിലെ ഉറപ്പ് നല്കിയെങ്കിലും ഫലമുണ്ടായില്ലെന്നും ഹാരിസണ് പറഞ്ഞു.