ഇന്ത്യൻ പ്രീമിയർ ലീഗിൽ 2023-ൽ മികച്ച ഫോമിലായിട്ടും എന്തുകൊണ്ടാണ് ടോപ് ഓർഡറിൽ ബാറ്റ് ചെയ്യുന്നില്ല എന്ന ചോദ്യത്തിന് ഡൽഹി ക്യാപിറ്റൽസ് ഓൾറൗണ്ടർ അക്സർ പട്ടേൽ രസകരമായ മറുപടി നൽകി. ഏത് സ്ഥാനത്ത് കളിച്ചാലും 10 – 12 ഓവർ വരെ തനിക്ക് ബാറ്റ് ചെയ്യാൻ കിട്ടുമെന്ന അഭിപ്രായമാണ് താരം ഉന്നയിച്ചത്. എന്തായാലും ഈ അഭിപ്രായം പറയുക വഴി തന്റെ സഹതാരങ്ങളെ മുഴുവൻ നൈസായിട്ട് താരം ട്രോളിയിരിക്കുകയാണ്. ഡൽഹി ബാറ്റിംഗിന്റെ മോശം ഫോമിനെയാണ് താരം ട്രോളിയത്.
ഇന്നിംഗ്സ് അവസാനം തകർത്തടിച്ച അക്സർ പട്ടേൽ 25 പന്തിൽ 54 റൺസ് നേടിയാണ് മടങ്ങിയത്. താരത്തിന്റെ മികവിലാണ് പൊരുതാവുന്ന സ്കോറിലേക്ക് ടീം എത്തിയത്. ബോളിംഗിലും മികച്ച പ്രകടനം പുറത്തെടുത്ത താരം വിക്കറ്റ് ഒന്നും നേടിയില്ലെങ്കിലും 20 റൺസ് മാത്രമാണ് വഴങ്ങിയത്.
മത്സരത്തിന് ശേഷമുള്ള വാർത്താസമ്മേളനത്തിൽ, 29 കാരനായ താരം ഓർഡറിന് മുകളിൽ ബാറ്റ് ചെയ്യാത്തത് എന്തുകൊണ്ടാണെന്ന് ചോദിച്ചു. തമാശ പ്രതികരണം നൽകി അദ്ദേഹം പറഞ്ഞു:
“ഞാനും അതിനെക്കുറിച്ച് ചിന്തിച്ചു, പക്ഷേ ഞാൻ ഇപ്പോഴും 10-12 ഓവർ ബാറ്റ് ചെയ്യുന്നുണ്ടെന്ന് എനിക്ക് മനസ്സിലായി (ചിരിക്കുന്നു). ഞാൻ എവിടെ ബാറ്റ് ചെയ്താലും, ഓർഡറിലേക്ക് ഉയർന്നാലും നമ്പർ 7 ആയാലും ഒരുപാട് ഓവറുകൾ കിട്ടുന്നുണ്ട്. എനിക്ക് അങ്ങനെ തന്നെ തോന്നുന്നു, അതിനാൽ ഞാൻ അതിനെക്കുറിച്ച് കൂടുതൽ സംസാരിക്കുന്നില്ല.”
ശേഷം തമാശ വിട്ടിട്ട് താരം ഇങ്ങനെ പറഞ്ഞു:
“ഞങ്ങൾ ഇതിനെക്കുറിച്ച് ആലോചിച്ചതാണ്. ടോപ് ഓർഡറിൽ ഞാൻ ബാറ്റ് ചെയ്താൽ ഫിനിഷിംഗ് ജോലി ചെയ്യാൻ ആരുണ്ടാകും. അങ്ങനെ പല കാര്യങ്ങൾ ആലോചിച്ചാണ് ഇത്തരത്തിലുള്ള തീരുമാനങ്ങൾ എടുക്കുന്നത്. ടീമിന്റെ വിജയത്തിന് സഹായിക്കുന്ന തന്ത്രങ്ങളാണ് ടീമിന് ആവശ്യം.
2013 സീസണിന് ശേഷമുള്ള ഏറ്റവും മോശം അവസ്ഥയിലൂടെയാണ് ടീം കടന്നുപോകുന്നത്.