ലോകോത്തര ബാറ്റ്സ്മാന്മാരെ വിറപ്പിക്കുന്ന മിച്ചല് സ്റ്റാര്ക്ക് എന്ന പേസ് ബൗളറോട് മാത്രമല്ല ഓസ്ട്രേലിയക്കാര്ക്ക് ഇഷ്ടം. മിച്ചലിന്റെ കുടുംബത്തിലെ മറ്റൊരാളെയും ഓസ്ട്രേലിയയിലെ കായിക പ്രേമികള് ആരാധിക്കുന്നു. മിച്ചലിന്റെ സഹോദരനായ ബ്രണ്ടന് സ്റ്റാര്ക്കാണ് ആ താരം. ഒളിമ്പിക്സ് ഹൈജംപില് രാജ്യത്തിനായി മത്സരിച്ച ബ്രണ്ടന് കൈയടിക്കാന് ഓസിസ് ക്രിക്കറ്റ് താരങ്ങളെല്ലാം കഴിഞ്ഞ ദിവസം ഒത്തുകൂടി.
ബംഗ്ലാദേശ് പര്യടനത്തിലുള്ള ഓസ്ട്രേലിയന് ക്രിക്കറ്റ് ടീം ട്വന്റി20 പരമ്പരയ്ക്ക് മുന്പായി ധാക്കയില് പരിശീലനത്തിലാണ്. പരിശീലനത്തിന് ഇടവേള നല്കിയാണ് ടോക്യോയില് ഹൈജംപില് മത്സരിച്ച ബ്രണ്ടനുവേണ്ടി അവര് കൈയടിക്കാനെത്തിയത്.
ക്യാപ്റ്റന് അലക്സ് ക്യാരിയുടെ നേതൃത്വത്തില് മിച്ചലിനൊപ്പം ലാപ്ടോപ്പില് ബ്രണ്ടന്റെ ഫൈനല് ഓസിസ് താരങ്ങള് വീക്ഷിക്കുന്ന ചിത്രം സമൂഹ മാധ്യമങ്ങളില് പോസ്റ്റ് ചെയ്തിട്ടുണ്ട്. എന്നാല് കംഗാരുപ്പടയുടെ കൈയടിയൊന്നും ബ്രണ്ടനെ മെഡല് പോഡിയത്തില് എത്തിച്ചില്ല. 2.35 മീറ്റര് ഉയര്ന്നു ചാടിയ ബ്രണ്ടന് അഞ്ചാം സ്ഥാനംകൊണ്ട് തൃപ്തിപ്പെടേണ്ടിവന്നു.