റിയാദില് കോവിഡ് രോഗിയായ മലയാളിയുടെ ഭാര്യയും കുഞ്ഞും ആത്മഹത്യ ചെയ്തു. കോഴിക്കോട് വാളേരി സ്വദേശി ബിജുവിന്റെ ഭാര്യയും മകളുമാണ് മരിച്ചത്. മണിപ്പൂരി സ്വദേശിയാണ് ഭാര്യ ലക്ഷ്മി ദേവി. മകള്ക്ക് ആറുമാസമാണ് പ്രായം. കോവിഡ് ബാധിച്ച ബിജു ആശുപത്രിയില് അത്യാസന്നനിലയിലാണ്.
ബിജുവിന്റെ എഴുപത് വയസ് പ്രായമായ അമ്മയും ഇവരോടൊപ്പം ഒന്നിച്ചു താമസിക്കുന്നുണ്ട്. ഇവര് ഫ്ളാറ്റിന് പുറത്തു ദീര്ഘസമയം നില്ക്കുന്നത് ശ്രദ്ധയില് പെട്ട അടുത്ത ഫ്ളാറ്റുകളിലെ താമസക്കാര് വിവരമന്വേഷിച്ചപ്പോള് ഫ്ളാറ്റ് അകത്തുനിന്നും പൂട്ടിയതായും തനിക്ക് അകത്ത് പ്രവേശിക്കാന് കഴിയുന്നില്ലെന്നും അറിയിക്കുകയായിരുന്നു. തുടര്ന്ന് പൊലീസെത്തി ഫ്ളാറ്റ് പരിശോധിച്ചപ്പോഴാണ് യുവതിയെയും കുഞ്ഞിനെയും അകത്ത് മരിച്ച നിലയില് കണ്ടെത്തിയത്.
ഏതാനും ദിവസങ്ങള്ക്കു മുമ്പാണ് ബിജുവിനെ കോവിഡ് ലക്ഷണങ്ങളോടെ ആശുപത്രിയില് പ്രവേശിപ്പിച്ചത്. അതിനു ശേഷം വിവരങ്ങളൊന്നും കുടുംബത്തിനു ലഭിച്ചിരുന്നില്ല. പിന്നീട് ബിജു വെന്റിലേറ്ററിലാണെന്ന വിവരം കുടുംബത്തിനു ലഭിച്ചു. ഇതോടെയാണ് ആത്മഹത്യ ചെയ്തതെന്നു കരുതുന്നു.