സൗദിയില്‍ പൈപ്പ് ലൈനിനുള്ളില്‍ കുടുങ്ങി ആറു തൊഴിലാളികള്‍ മരിച്ചു. സൗദി തലസ്ഥാന നഗരമായ റിയാദിലെ അസീസിയ ഭാഗത്ത് ഭൂഗര്‍ഭ വെള്ള പൈപ്പിനുള്ളില്‍ കുടുങ്ങിയാണ് തൊഴിലാളികള്‍ മരിച്ചത്.
400 മീറ്റര്‍ നീളവും ഒരു മീറ്റര്‍ മുഖ വിസ്താരവുമുള്ള പൈപ്പിനുള്ളില്‍ അറ്റകുറ്റപ്പണിയെടുത്തിരുന്ന ഒരു കമ്പനിയിലെ ആറു ജീവനക്കാര്‍ക്കാണ് ജീവന്‍ നഷ്ടപ്പെട്ടത്. സഹപ്രവര്‍ത്തകരുമായുള്ള ആശയവിനിമയം മുറിഞ്ഞതിനാല്‍ ഇവര്‍ക്ക് പുറത്തു കടക്കാന്‍ കഴിയാതെ വരുകയായിരുന്നു.
പൈപ്പില്‍ ദ്വാരങ്ങളുണ്ടാക്കിയാണ് ആറു പേരെയും പുറത്തെടുത്തത്. മെഡിക്കല്‍ സംഘം നടത്തിയ പരിശോധനയില്‍ ആറു പേരും മരിച്ചതായി സ്ഥിരീകരിച്ചു. അപകടത്തെ കുറിച്ച് അന്വേഷണം ആരംഭിച്ചു. മരിച്ച തൊഴിലാളികള്‍ ഏതു രാജ്യക്കാരാണെന്ന് അധികൃതര്‍ വ്യക്തമാക്കിയിട്ടില്ല.
