തട്ടിപ്പ് ആരോപണത്തിൽ നിയമത്തെ നേരിടാൻ ഇന്ത്യയിലേക്ക് കൈമാറാനുള്ള 2018-ലെ തീരുമാനത്തിനെതിരെ വ്യവസായി വിജയ് മല്യ നൽകിയ അപ്പീൽ ലണ്ടൻ ഹൈക്കോടതി തള്ളി. കേസ് ഇനി ഒരു അന്തിമ തീരുമാനത്തിനായി യു.കെ ആഭ്യന്തര സെക്രട്ടറി പ്രീതി പട്ടേലിന്റെ മുമ്പാകെ എത്തും.
വ്യോമയാനം മുതൽ മദ്യം വരെയുള്ള ബിസിനസ് നടത്തിയിരുന്ന 64 വയസുകാരനായ വിജയ് മല്യ ഇന്ത്യയിലെ ബാങ്കുകളിൽ നിന്നും 9,000 കോടി രൂപയുടെ വായ്പയാണ് കബളിപ്പിച്ചത്. ബാങ്കുകളിൽ നിന്നും കിംഗ്ഫിഷർ എടുത്ത വായ്പകൾ തിരിച്ചടയ്ക്കാൻ വിജയ് മല്യക്ക് ഉദ്ദേശമില്ലെന്നാണ് അധികൃതർ വാദിക്കുന്നത്. തനിക്കെതിരായ ആരോപണം നിഷേധിച്ച വിജയ് മല്യ ഇപ്പോൾ ജാമ്യത്തിലാണ്.