ലാന്‍ഡിങ്ങിന് തൊട്ടു മുമ്പ് മുന്‍ചക്രം പണിമുടക്കിയിട്ടും പതറാതെ വിമാനം അതിസാഹസികമായി ലാന്‍ഡ് ചെയ്ത് പൈലറ്റ്. 89 യാത്രക്കാരുമായി യാംഗൂണില്‍ നിന്ന് മ്യാന്‍മാറിലെ മണ്ടാലെ എയര്‍പോര്‍ട്ടിലേക്ക് എത്തിയ വിമാനമാണ് പൈലറ്റ് മിയാത് മോയ് ഓങ് അതിസാഹസിക പ്രകടനത്തിലൂടെ അപകടം ഒന്നും സംഭവിക്കാതെ സുരക്ഷിതമായി ഇറക്കിയത്
മ്യാന്‍മാര്‍ നാഷണല്‍ എയര്‍ലൈന്‍സിന്റെ എംപവര്‍ 190 വിമാനത്തിന്റെ മുന്‍ചക്രമാണ് ലാന്‍ഡിങ്ങിന് തൊട്ടുമുമ്പ് പണിമുടക്കിയത്. ചക്രം ശരിയാക്കാന്‍ എല്ലാ വഴികളും നോക്കിയെങ്കിലും പരാജയപ്പെട്ടു. ഇതേ തുടര്‍ന്നാണ് മിയാത് മോയ് ഓങ് അടിയന്തര ലാന്‍ഡിങ്ങ് നടത്തിയത്.
വിമാനത്തിന്റെ ഭാരം കുറയ്ക്കാനായി കഴിയുന്നത്ര ഇന്ധനം ഉപയോഗിച്ചു തീര്‍ത്തിരുന്നു. നിലത്തേക്കിറങ്ങിയ വിമാനം മുന്‍ഭാഗം നിലത്ത് തട്ടുന്നതിനു മുമ്പ് പിന്നിലെ ചക്രങ്ങളിലേക്ക് ചായിച്ച് അതിസാഹസികമായി ഇറക്കുകയായിരുന്നു. വിമാനം റണ്‍വെയില്‍ നിന്ന് തെന്നി മാറിയെങ്കിലും യാത്രക്കാര്‍ക്കൊന്നും പരുക്കില്ല.
പൈലറ്റിന്റെ അതിസാഹസികതയ്ക്ക് നിറഞ്ഞ കൈയടിയാണ് അധികൃതരില്‍ നിന്നും സോഷ്യല്‍ മീഡിയയില്‍ നിന്നും ലഭിക്കുന്നത്. തങ്ങളുടെ ജീവന്‍ രക്ഷിച്ചതിന് യാത്രക്കാരും പൈലറ്റിനോട് നന്ദി പറഞ്ഞു.