സ്കൂൾ ഗെയിംസിൽ പങ്കെടുക്കുന്നതിനായി ഓസ്ട്രേലിയയിലെത്തിയ ഇന്ത്യൻ വിദ്യാർഥിനി കടലിൽ മുങ്ങിമരിച്ചു. ഡൽഹിയിൽ നിന്നുള്ള നിതിഷ(15) എന്ന വിദ്യാർഥിനിയാണു മരിച്ചത്. ഗെയിംസ് അവസാനിച്ചശേഷം ഞായറാഴ്ച വൈകിട്ട് ഗ്ലെനെൽഗ് ഹോൾഡ്ഫാസ്റ്റ് മറീന ബീച്ചിൽ നാലു സുഹൃത്തുക്കൾക്കൊപ്പം സെൽഫി പകർത്തവെ നിതിഷ ഉൾപ്പടെയുള്ളവർ കൂറ്റൻ തിരമാലയിൽപ്പെടുകയായിരുന്നെന്ന് സ്കൂൾ ഗെയിംസ് ഫെഡറേഷൻ ഓഫ് ഇന്ത്യ പ്രസിഡന്‍റ് രാജേഷ് മിശ്ര പറഞ്ഞു.
ഇന്ത്യയിൽനിന്നുള്ള ഫുട്ബോൾ ടീമിന്‍റെ ഭാഗമായിരുന്നു നിതിഷ. പസഫിക് സ്കൂൾ ഗെയിംസിൽ പങ്കെടുക്കുന്നതിനായി 120 അംഗ ഇന്ത്യൻ സംഘത്തോടൊപ്പമാണ് നിതിഷ ഓസ്‌ട്രേലിയയിലെ അഡ്ലെയ്ഡിലെത്തിയത്. കൂടെയുണ്ടായിരുന്ന ബാക്കി നാലുപേരെ സുരക്ഷ ജീവനക്കാർ രക്ഷപെടുത്തി.
കടലിൽ കാണാതായ നിതീഷയുടെ മൃതദേഹം ഇന്ന് രാവിലെയാണ് കണ്ടെത്തിയത്. ഓസ്ട്രേലിയൻ സർക്കാരും സ്കൂൾ സ്പോർട്സ് ഓസ്ട്രേലിയയും സംയുക്തമായാണു ദി പസഫിക് സ്കൂൾ ഗെയിംസ് സംഘടിപ്പിക്കുന്നത്.