500 ബില്യൺ ഡോളറിൻ്റെ (50,000 കോടി ഡോളർ) ആസ്തിയുള്ള ആദ്യ വ്യക്തിയായായി ടെസ്ല സിഇഒ ഇലോൺ മസ്ക്. ഫോബ്സിന്റെ റിയൽടൈം ബില്യണയർ പട്ടിക പ്രകാരം ലോക സമ്പന്നനായ മസ്കിന്റെ നിലവിലെ ആസ്തി 500.1 ബില്യൺ ഡോളറാണ്. ഏകദേശം 44.34 ലക്ഷം കോടി രൂപ. പട്ടികയിൽ രണ്ടാം സ്ഥാനത്തുള്ള ഒറാക്കിൾ സഹസ്ഥാപകൻ ലാറി എലിസണിൻ്റെ ആസ്തിയേക്കാൾ 150 ബില്യൺ ഡോളർ മുന്നിലാണ് മസ്കിന്റെ ആസ്തി.
നേരത്തെ യുഎസ് പ്രസിഡൻ്റ് ഡൊണൾഡ് ട്രംപിന്റെ ഉപദേശകനായിരുന്ന സമയത്താണ് ഡിസംബറിൽ മസ്കിന്റെ ആസ്തി 400 ബില്യൺ ഡോളർ കടന്നത്. ടെസ്ലയിലെ ഓഹരി പങ്കാളിത്തമാണ് മസ്കിൻ്റെ സമ്പത്തിന്റെ വലിയ ഭാഗം. 12.4 ശതമാനം ഓഹരിയാണ് മസ്കിനുള്ളത്. ഈ വർഷം ഇതുവരെ 14 ശതമാനം നേട്ടമാണ് കമ്പനിയുടെ ഓഹരി വിലയിലുണ്ടായത്.
ബുധനാഴ്ച ഓഹരി നാലു ശതമാനം നേട്ടത്തിലായതോടെ 9.3 ബില്യൺ ഡോളറാണ് മസ്കിൻ്റെ ആസ്തിയിൽ കുട്ടിച്ചേർക്കപ്പെട്ടത്. മസ്കിന്റെ മറ്റ് സംരംഭങ്ങളായ എഐ സ്റ്റാർട്ടപ്പ് xAI, സ്പേസ്എക്സ് എന്നിവയുടെ മൂല്യം വർധിച്ചതും മസ്കിന് നേട്ടമായി. XAI ൻ്റെ മൂല്യം ജുലൈയിൽ 75 ബില്യൺ ഡോളറിനാണ് കണക്കാക്കിയത്.