ഇസ്കോണിനെ നിരോധിക്കണമെന്നാവശ്യപ്പെട്ട് സുപ്രീംകോടതി അഭിഭാഷകര് ബംഗ്ലാദേശ് സര്ക്കാരിനു നോട്ടീസയച്ചു. സാമുദായിക സംഘര്ഷമുണ്ടാക്കുന്നതിനായി ഇസ്കോണ് തീവ്രവാദ പ്രവര്ത്തനം നടത്തുന്നതായി ആരോപിച്ചാണ് അവര് രംഗത്തെത്തിയിരിക്കുന്നത്.
ഹിന്ദുനേതാവായ കൃഷ്ണദാസിന്റെ അറസ്റ്റിനെ തുടര്ന്ന് ബംഗ്ലാദേശില് വ്യാപക സംഘര്ഷം ഉടലെടുത്തിരുന്നു. ഇതേ തുടര്ന്നാണ് സുപ്രീംകോടതി അഭിഭാഷകര് കടുത്ത നിലപാട് എടുത്തത്.
അതേസമയം, കൃഷ്ണദാസിന്റെ അറസ്റ്റിലും ജാമ്യം നിഷേധിക്കലിലും ഉത്കണ്ഠ രേഖപ്പെടുത്തി ഇന്ത്യ രംഗത്തെത്തി. ഹിന്ദുക്കളുടെയും മറ്റു ന്യൂനപക്ഷങ്ങളുടെയും സുരക്ഷ ഉറപ്പാക്കണമെന്നും കേന്ദ്രം ആവശ്യപ്പെട്ടു. അതിനിടെ, അഡ്വ. ഇസ്ലാമിന്റെ കൊലാപാതകത്തിന് ഉത്തരവാദികളായവരെ പ്രോസിക്യൂട്ട് ചെയ്യണമെന്നും അല് മാമൂന് റസലിന്റെ നേതൃത്വത്തില് പത്ത് അഭിഭാഷകര് സര്ക്കാരിനോട് ആവശ്യപ്പെട്ടു.
സമാധാനപരമായ സഹവര്ത്തിത്വം ഉറപ്പാക്കാന് നേരത്തെ ഇസ്കോണ് ബംഗ്ലാദേശ് സര്ക്കാരിനോട് ആവശ്യപ്പെട്ടിരുന്നു. ദാസിന്റെ അറസ്റ്റില് സംഘടന ഉത്കണ്ഠയും രേഖപ്പെടുത്തിയിരുന്നു.
ബംഗ്ലാദേശ് സമ്മിലിത സനാതനി ജഗരണ് ജോഡിന്റെ വക്താവായ ദാസ് കഴിഞ്ഞ ദിവസം ധാക്കയിലെ ഹസ്രത് ഷാജലാല് അന്താരാഷ്ട്ര വിമാനത്താവളത്തിലാണ് അറസ്റ്റിലായത്. ഒരു റാലിയില് പങ്കെടുക്കാനായി ചത്തോഗ്രാമിലേക്കു പോകുംവഴിയായിരുന്നു അറസ്റ്റ്.
ഇസ്കോണ് നേതാവ് കൂടിയായ ചിന്മയ് ദാസിനെ കോടതിയില് ഹാജരാക്കിയെങ്കിലും ജാമ്യം ലഭിച്ചില്ല. തുടര്ന്ന് ജയിലിലേക്ക് കൊണ്ടുപോകുന്നത് അനുയായികള് തടഞ്ഞു. പിന്നീടുണ്ടായ സംഘര്ഷത്തിലാണ് അഭിഭാഷകന് കൊല്ലപ്പെട്ടത്.
മാസങ്ങള്ക്ക് മുമ്പുനടന്ന ചടങ്ങില് ദേശീയ പതാകയെ അപമാനിച്ചെന്ന കേസിലാണ് ധാക്ക വിമാനത്താവള പരിസരത്തുനിന്ന് കഴിഞ്ഞ ദിവസം സമ്മിളിത സനാതനി ജോട്ട് സംഘടന നേതാവിന്റെ അറസ്റ്റ്. മറ്റു 18 പേര്ക്കെതിരെയും കേസ് എടുത്തിട്ടുണ്ട്.
മുന് പ്രധാനമന്ത്രി ശൈഖ് ഹസീനയെ പുറത്താക്കിയ ശേഷം ന്യൂനപക്ഷങ്ങള്ക്കു നേരെ രാജ്യത്ത് ആക്രമണം വ്യാപകമാണെന്ന ആരോപണങ്ങള്ക്കിടെയാണ് അറസ്റ്റ്. കോടതിയില് ഹാജരാക്കുന്ന വിവരമറിഞ്ഞ് തടിച്ചുകൂടിയ അനുയായികള് പ്രതിഷേധിച്ചെങ്കിലും ജാമ്യം അനുവദിച്ചില്ല. ധാക്ക, ചിറ്റഗോങ്, കുമില്ല, ഖുല്ന, ദിനാജ്പൂര്, കോക്സ് ബസാര് തുടങ്ങി രാജ്യത്തിന്റെ വിവിധ ഭാഗങ്ങളില് അറസ്റ്റിനെതിരെ പ്രതിഷേധം നടന്നു. ചിറ്റഗോങ്ങില് നൂറുകണക്കിനുപേരാണ് ദാസിന്റെ മോചനമാവശ്യപ്പെട്ട് തെരുവിലിറങ്ങിയത്.