ബുധനാഴ്ച രാവിലെ 6.30 ന് കാലിഫോർണിയയിലെ സാൻജോസ് റെയിൽ യാർഡിൽ സഹപ്രവർത്തകർക്കു നേരെ വെടിയുതിർത്ത് ഒമ്പതുപേരെ കൊന്നതിനുശേഷം സ്വയം ജീവനൊടുക്കിയ സാമുവേൽ കാസ്സിഡി (57) ബൈപോളാർ ലക്ഷണങ്ങൾ കാട്ടിയിരുന്നു എന്നും അതിനാലാണ് താൻ വിവാഹത്തിന് തയ്യാറാകാതിരുന്നതെന്നും മുൻ പെൺസുഹൃത്ത്.
തങ്ങളുടെ വിവാഹമോചനത്തിനുപിന്നിലും ഇതേ കാരണങ്ങൾ ആണെന്ന് കാസിഡിയുടെ മുൻ ഭാര്യ സിസിലിയ നെംസും വെളിപ്പെടുത്തി.
” നല്ല മൂഡിലിരിക്കുമ്പോൾ അയാൾ മഹത്തായ മനസ്സിനുടമയാണ്. അത് മാറുമ്പോൾ ഭ്രാന്തനും” . സിസിലിയ പറഞ്ഞു. താൻ സഹപ്രവർത്തകരെ കൊല്ലും എന്നെല്ലാം ഇടയ്ക്കിടെ പറയുമായിരുന്നു. പത്തുകൊല്ലത്തെ ദാമ്പത്യത്തിനു ശേഷം ഇവർ 2005-ലാണ് വേർപിരിഞ്ഞത്.
പിന്നീടു വന്ന പെൺസുഹൃത്തും ഇതേ കാരണത്താൽ വേർപിരിഞ്ഞു.
സാമാന്യം ഭേദപ്പെട്ട വരുമാനവും സമ്പാദ്യവും ഉണ്ടായിരുന്നയാളാണ് സാമുവേൽ. ഇയാൾക്ക് അയൽക്കാരുമായി അടുപ്പമുണ്ടായിരുന്നില്ല.
ബുധനാഴ്ച രാവിലെ വെടിവെപ്പ് നടക്കുന്ന അതേ സമയത്ത് പത്തുമൈൽ ദൂരെയുള്ള സാമുവേലിന്റെ വീടും കത്തുപിടിച്ചിരുന്നു.