മലയാളത്തില് ഫോര് കെ അറ്റമോസില് ‘സ്ഫടികം’ എത്തിയപ്പോള് ഗംഭീര സ്വീകരണമായിരുന്നു തിയേറ്ററില് നിന്നും ലഭിച്ചത്. മൂന്ന് കോടിയോളം കളക്ഷന് ചിത്രം നേടിയിരുന്നു. ഇപ്പോഴിതാ, മമ്മൂട്ടി അനശ്വരമാക്കിയ ഒരു സിനിമ കൂടി ഫോര് കെ അറ്റ്മോസില് റിലീസ് ചെയ്യാന് ഒരുങ്ങുകയാണ്.
മമ്മൂട്ടിയുടെ കരിയറില് ബെസ്റ്റ് സിനിമകളില് ഒന്നായ ‘വല്ല്യേട്ടന്’ ആണ് ആ സിനിമ. ചിത്രത്തിന്റെ നിര്മാതാവ് ബൈജു അമ്പലക്കരയാണ് ഇക്കാര്യം അറിയിച്ചിരിക്കുന്നത്. ഒരു യൂട്യൂബ് ചാനലിന് നല്കിയ അഭിമുഖത്തിലാണ് നിര്മ്മാതാവ് സംസാരിച്ചത്. സ്ഫടികം കണ്ട് ഇഷ്ടപ്പെട്ടതു കൊണ്ടാണ് വല്ല്യേട്ടന് ഇറക്കാന് തീരുമാനിച്ചത് എന്നാണ് നിര്മ്മാതാവ് പറയുന്നത്.
”സ്ഫടികം’ ഫോര് കെയില് ഇറക്കിയത് എനിക്ക് ഭയങ്കരമായി ഇഷ്ടപ്പെട്ടു. ഞാനും തിയേറ്ററില് പോയി പടം കണ്ടിരുന്നു. ഇപ്പോഴത്തെ ന്യൂജനറേന് ഈ സിനിമ തിയറ്ററില് കണ്ടിട്ടില്ല. ടിവിയിലെ കണ്ടിട്ടുള്ളൂ. ഫോര്കെ അറ്റ്മോസില് അത് വളരെ മനോഹരമായിരുന്നു. അതുപോലെ വല്ല്യേട്ടന് എന്ന സിനിമ ഞാന് ഫോര് കെയില് ചെയ്യാനുള്ള തീരുമാനത്തിലാണ്.”
”അതിന്റെ പണികള് ഉടനെ തുടങ്ങണം. വല്ല്യേട്ടന്റെ പല രംഗങ്ങളും യുട്യൂബ് പോലുള്ളവയില് മോഷണം ചെയ്തിട്ടുണ്ട്. ഞാന് അറിയാതെ കള്ള ഒപ്പിട്ട് റൈറ്റ് കൊടുക്കുകയൊക്കെ ഉണ്ടായി. നിലവില് സിനിമയ്ക്ക് മൊത്തത്തില് സ്റ്റേ വാങ്ങിച്ച് ഇട്ടേക്കുവാണ്. വല്ല്യേട്ടന് സിനിമ ലോകത്ത് ആരും ഇനി തൊടാതിരിക്കാന് വേണ്ടി കോടതിയില് നിന്നും സ്റ്റേയും വാങ്ങിച്ചു.”
”ഇനി കുറച്ച് കാര്യങ്ങളൊക്കെ ചെയ്യാനുണ്ട്. അതിന് ശേഷം സിനിമയുടെ ഫോര് കെ ചെയ്യും. ഇത് എത്ര നീണ്ടു പോകുന്നോ അത്രയും നല്ലതാണ്. കാരണം ന്യൂ ജനറേഷന് വളര്ന്നു കൊണ്ടിരിക്കയല്ലേ. അവര്ക്ക് വേണ്ടിയാണ് നമ്മളിത് ചെയ്യാന് പോകുന്നത്. ഫോര് കെ അറ്റ്മോസില് ഞാനും ഷാജി കൈലാസും കൂടി എറണാകുളം സവിത തിയേറ്ററില് ഇട്ട് സിനിമ കണ്ടിരുന്നു.”
”ഒരു റീല് മാത്രം. എന്തൊരു മനോഹരമായിരുന്നു. മമ്മൂക്കയുടെ സൗന്ദര്യത്തെ കുറിച്ച് ഒന്നും പറയാനില്ല. അത്രയും മനോഹരമായാണ് അതില് അദ്ദേഹത്തെ കാണിക്കുന്നത്. എന്തായാലും വല്ല്യേട്ടന് ഉടന് ഫോര് കെ കാണും” എന്നാണ് നിര്മ്മാതാവ് പറയുന്നത്.