പന്തല്ലൂരില്‍ മൂന്ന് വയസുകാരിയെ കടിച്ചുകൊന്ന പുലിയെ മയക്കുവെടിവച്ച് കൂട്ടിലാക്കി. ഉച്ചയ്ക്ക് രണ്ട് മണിയോടെ ആയിരുന്നു മയക്ക് വെടിവച്ചത്. വൈകുന്നേരം 3.30ഓടെ പുലിയെ കൂട്ടിലാക്കുകയായിരുന്നു. ഉടന്‍തന്നെ മുതുമല വന്യജീവി സങ്കേതത്തിലേക്ക് മാറ്റുമെന്നാണ് വനംവകുപ്പ് ഉദ്യോഗസ്ഥര്‍ അറിയിക്കുന്നത്.
മൂന്ന് വയസുകാരിയെ കൊലപ്പെടുത്തിയ പുലിയെ വെടിവച്ച് കൊല്ലണമെന്ന് ആവശ്യപ്പെട്ട് നാട്ടുകാര്‍ ഇന്നലെ വൈകുന്നേരം മുതല്‍ റോഡ് ഉപരോധിച്ച് പ്രതിഷേധിച്ചിരുന്നു. ഇന്ന് പ്രദേശത്ത് ഹര്‍ത്താലും പ്രഖ്യാപിച്ചിരുന്നു. കഴിഞ്ഞ ദിവസം രാത്രി പ്രതിഷേധത്തിന്റെ ഭാഗമായി ഗൂഡല്ലൂര്‍-പന്തല്ലൂര്‍ താലൂക്കുകളില്‍ നാട്ടുകാര്‍ റോഡ് ഉപരോധിച്ചിരുന്നു. ഇതേ തുടര്‍ന്ന് നാടുകാണിച്ചുരം വഴി കേരളത്തിലേക്കുള്ള ഗതാഗതം സ്തംഭിച്ചു.
കഴിഞ്ഞ ദിവസം പന്തല്ലൂര്‍ താലൂക്കിലെ വിവിധ ഇടങ്ങളില്‍ വനംവകുപ്പ് കൂട് സ്ഥാപിച്ചെങ്കിലും പുലിയെ പിടികൂടാന്‍ സാധിച്ചില്ല. കഴിഞ്ഞ ദിവസം വൈകുന്നേരമാണ് ഗൂഡല്ലൂരിലെ ദേവാന മാംഗോ വില്ലേജില്‍ മൂന്ന് വയസുകാരിയെ പുലി ആക്രമിച്ചത്. ജാര്‍ഖണ്ഡ് സ്വദേശികളായ ശിവശങ്കറിന്റെയും മിലന്‍ ദേവിയുടെയും മകള്‍ നാന്‍സിയാണ് ആക്രമണത്തില്‍ കൊല്ലപ്പെട്ടത്. അങ്കണവാടിയില്‍ നിന്ന് തിരികെ വരുമ്പോഴായിരുന്നു കുട്ടിയെ പുലി ആക്രമിച്ചത്.
