ബീഹാറില് സര്ക്കാര് സ്കൂള് അദ്ധ്യാപകനെ തട്ടിക്കൊണ്ടുപോയി നിര്ബന്ധിപ്പിച്ച് വിവാഹം കഴിപ്പിച്ചു. ബീഹാറിലെ പടേപൂര് റെപുരയില് ബുധനാഴ്ചയാണ് സംഭവം നടന്നത്. റെപുരയിലെ ഉത്ക്രാമിത് മധ്യ വിദ്യാലയത്തിലെ അദ്ധ്യാപകന് ഗൗതം കുമാറിനെയാണ് തട്ടിക്കൊണ്ടുപോയി വിവാഹം കഴിപ്പിച്ചത്.
നാല് പേര് സ്കൂളിലെത്തി അദ്ധ്യാപകനെ തട്ടിക്കൊണ്ടുപോകുകയായിരുന്നു. പ്രതികളില് ഒരാളായ രാജേഷ് റായിയുടെ മകളുമായാണ് ഗൗതം കുമാറിന്റെ വിവാഹം നടത്തിയത്. സംഭവത്തെ തുടര്ന്ന് അദ്ധ്യാപകന്റെ കുടുംബം റോഡ് ഉപരോധിച്ച് പ്രതിഷേധിച്ചിരുന്നു. രാജേഷ് റായിയുടെ മകള് ചാന്ദ്നിയെ അദ്ധ്യാപകനെക്കൊണ്ട് നിര്ബന്ധപൂര്വ്വം വിവാഹം കഴിപ്പിച്ചതായാണ് പരാതി.
വിവാഹഭ്യര്ത്ഥന നിരസിച്ച ഗൗതം കുമാറിനെ തട്ടിക്കൊണ്ടുപോയവര് ശാരീരികമായി ഉപദ്രവിച്ചതായും പരാതിയില് പറയുന്നു. സംഭവത്തെ തുടര്ന്ന് എഫ്ഐആര് രജിസ്റ്റര് ചെയ്ത് അന്വേഷണം ആരംഭിച്ചതായും തട്ടിക്കൊണ്ടുപോയവരെ ഉടന് പിടികൂടുമെന്നും പൊലീസ് അറിയിച്ചിട്ടുണ്ട്.
