ജമ്മു കശ്മീരിലെ പഹല്ഗാമിലുണ്ടായ ഭീകരാക്രമണത്തിന് പിന്നാലെ ഇന്ത്യന് സൈന്യത്തിന്റെ ഓപ്പറേഷന് സിന്ദൂര് വിജയകരമായി പൂര്ത്തിയായെന്ന് വ്യോമസേന അറിയിപ്പ്. ദൗത്യങ്ങള് അവസാനിപ്പിച്ചിട്ടില്ലെന്നും ഇപ്പോഴും തുടരുകയാണെന്നും വ്യോമസേന വ്യക്തമാക്കുന്നു. എക്സില് പങ്കുവച്ച കുറിപ്പിലൂടെയാണ് വ്യോമസേനയുടെ വിശദീകരണം.
വെടിനിര്ത്തല് പ്രാബല്യത്തിലിരിക്കെയാണ് സേനയുടെ ഇത്തരത്തിലുള്ള ഒരു പ്രതികരണമെന്നതും ശ്രദ്ധേയമാണ്. ഓപ്പറേഷന് സിന്ദൂരില് ഇന്ത്യന് വ്യോമസേനയ്ക്ക് നിര്ദ്ദേശിക്കപ്പെട്ട ദൗത്യങ്ങള് കൃത്യതയോടെയും പ്രൊഫഷണലിസത്തോടെയും വിജയകരമായി നിര്വ്വഹിച്ചിരിക്കുന്നു. ദേശീയ ലക്ഷ്യങ്ങള്ക്കനുസൃതമായി, തികഞ്ഞ ആസൂത്രണത്തോടെയും രഹസ്യസ്വഭാവത്തോടെയുമാണ് ഓപ്പറേഷനുകള് നടത്തപ്പെട്ടത്.
ഓപ്പറേഷനുകള് ഇപ്പോഴും തുടരുന്നതിനാല്, വിശദമായ ഒരു വിവരണം യഥാസമയം നല്കുന്നതായിരിക്കും. അഭ്യൂഹങ്ങളില് നിന്നും സ്ഥിരീകരിക്കാത്ത വിവരങ്ങള് പ്രചരിപ്പിക്കുന്നതില് നിന്നും ഏവരും വിട്ടുനില്ക്കണമെന്ന് വ്യോമസേന അഭ്യര്ത്ഥിക്കുന്നുവെന്നും എക്സില് കുറിച്ചു.
വെടിനിര്ത്തല് പ്രഖ്യാപിച്ചതിന് പിന്നാലെ പ്രധാനമന്ത്രിയുടെ വസതിയില് ചേര്ന്ന ഉന്നതതല യോഗത്തില് രാജ്നാഥ് സിങ്, ചീഫ് ഓഫ് ഡിഫന്സ് സ്റ്റാഫ് അനില് ചൗഹാന്, മൂന്ന് സേനാ മേധാവികള് തുടങ്ങിയവര് പങ്കെടുത്തു.