ലോക്‌സഭ തിരഞ്ഞെടുപ്പിന്റെ വോട്ടെണ്ണല്‍ അവസാന ഘട്ടത്തിലേക്ക്. ബിജെപി മൃഗീയ ഭൂരിപക്ഷം ഉറപ്പിച്ച് കഴിഞ്ഞു. 542 അംഗ സഭയില്‍ 350 സീറ്റുകള്‍ ഏതാണ്ട് ഉറപ്പിച്ച മട്ടാണ് എന്‍ഡിഎ. കേരളം, തമിഴ്‌നാടും, പഞ്ചാബും ഒഴികെ മറ്റെല്ലാ സംസ്ഥാനത്തും ബിജെപിയും സഖ്യകക്ഷികളും ഏതാണ്ട് മുദ്ര പതിപ്പിച്ച് കഴിഞ്ഞു.
ഇനി ബിജെപി ഉറ്റുനോക്കുന്നത് കേരളത്തിലേക്കാണ്. ഇത്തവണ അക്കൗണ്ട് തുറക്കാന്‍ സാധിക്കാത്ത കേരളത്തില്‍ അടുത്ത തവണ പിടിക്കുമെന്ന് ഉറപ്പിച്ചു പറയുകയാണ് ബി.ജെ.പി നേതൃത്വം.
അടുത്ത തിരഞ്ഞെടുപ്പില്‍ കേരളത്തില്‍ ബിജെപി മികച്ച പ്രകടനം കാഴ്ചവെയ്ക്കുമെന്ന് ദേശീയ വക്താവ് ജി വി എല്‍ നരസിംഹ റാവു പറഞ്ഞു. ഇത്തവണ പശ്ചിമ ബംഗാളും ഒഡീഷയും കീഴടക്കിയതു പോലെ അടുത്ത തവണ കേരളവും പിടിക്കുമെന്നാണ് റാവുവിന്റെ പ്രഖ്യാപനം.
അതേസമയം 20 ല്‍ 19 സീറ്റുകളും നേടി കേരളത്തില്‍ കോണ്‍ഗ്രസ് ലീഡ് നേടിയപ്പോള്‍ ബിജെപിക്ക് ഒരു സീറ്റു പോലും നേടാനായില്ല. പശ്ചിമ ബംഗാളില്‍ ബിജെപി 19 സീറ്റില്‍ ലീഡ് നേടിയിട്ടുണ്ട്. ഒഡീഷയിലെ 21 സീറ്റില്‍ ഏഴു സീറ്റില്‍ ലീഡ് നേടിയിരുന്നു ബിജെപി.