ഇന്ത്യ ലോക കപ്പില്‍ ഇംഗ്ലണ്ടിനോട് തോറ്റത് ഓറഞ്ച് – ബ്ലൂ ജെഴ്‌സിയാണെന്ന് താന്‍ ട്വീറ്റ് ചെയത് തമാശയ്ക്കാണെന്ന് പി.ഡി.പി നേതാവ് മെഹ്ബൂബ മുഫ്തി. ഹിന്ദുക്കളോട് മുസ്‌ലിങ്ങളെ കൂട്ടബലാത്സംഗം ചെയ്യാന്‍ ആവശ്യപ്പെടുന്ന ബി.ജെ.പി നേതാവിന്റെ ട്വീറ്റിനേക്കാള്‍ ആക്രമിക്കപ്പെട്ടത് ഇന്ത്യയുടെ പ്രകടനത്തെ പറ്റി തമാശയായി എഴുതിയ തന്റെ ട്വീറ്റാണെന്നും അവര്‍ പരിഹസിച്ചു. തന്റെ ട്വീറ്റ് നിരുപദ്രവകരമായിരുന്നെന്നും അവര്‍ പറഞ്ഞു. ബി.ജെ.പി നേതാവിന്റെ ട്വീറ്റിന് എതിരെ എന്തുകൊണ്ട് പ്രതിഷേധമുയരുന്നില്ല എന്നും അവര്‍ ചോദിച്ചു.
ജെഴ്സിയിലെ മാറ്റം കൊണ്ടാണ് ഇന്നലത്തെ മത്സരത്തില്‍ ഇന്ത്യ ഇംഗ്ലണ്ടിനോട് പരാജയപ്പെട്ടതെന്നാണ് മെഹ്ബൂബ മുഫ്തി പറയുന്നത്. “എന്നെ അന്ധവിശ്വാസിയെന്ന് വിളിച്ചോളൂ പക്ഷെ ആ ജെഴ്സിയാണ് ഇന്ത്യയുടെ വിജയ തേരോട്ടത്തിന് തടയിട്ടത്”, ഇതായിരുന്നു മത്സരഫലം അറിഞ്ഞ ശേഷം മെഹ്ബൂബ ട്വിറ്ററില്‍ കുറിച്ചത്.
ട്വീറ്റിനു പിന്നാലെ ബി.ജെ.പി നേതാക്കള്‍ മെഹ്ബൂബയെ ആക്രമിക്കുകയായിരുന്നു. പാകിസ്ഥാനു വേണ്ടി മെഹ്ബൂബയുടെ ഹൃദയം നോവുന്നുവെന്ന് ജമ്മുകശ്മീരിലെ ബി.ജെ.പി അധ്യക്ഷന്‍ രവീന്ദര്‍ റെയ്ന പറഞ്ഞിരുന്നു.