കൂലിയായി ലഭിക്കേണ്ട അഞ്ഞൂറ് രൂപയെ ചൊല്ലിയുള്ള തര്ക്കത്തിനൊടുവില് യുവാവിനെ കൊലപ്പെടുത്തി കണ്ണുകള് ചൂഴ്ന്നെടുത്തു. ബീഹാര് ഭോജ്പൂരിലെ അരയിലാണ് ക്രൂര കൃത്യം അരങ്ങേറിയത്. മോഹന് സിങ് എന്ന ഇരുപതുകാരനെയാണ് സുഹൃത്തുക്കള് കൊലപ്പെടുത്തിയ ശേഷം മൃതദേഹം വികൃതമാക്കിയത്.
അജയ് മഹാതോ എന്നയാളില് നിന്ന് മോഹന് സിങിന് കൂലിയായി 500 രൂപ ലഭിക്കാനുണ്ടായിരുന്നു. ഇതേ കുറിച്ച് പലതവണ ചോദിച്ചെങ്കിലും അജയ് മഹാതോ നല്കാന് തയ്യാറായില്ല. പണത്തെ കുറിച്ച് ഇടയ്ക്കിടെ ചോദിച്ചതാണ് കൊലപാതകത്തിന് കാരണമായത്. കൊലയ്ക്കായി മോഹന് സിങിന്റെ സുഹൃത്തുക്കളെ തന്നെയാണ് പ്രതി ഏര്പ്പാടാക്കിയത്.
അജയ് മഹാതോയുടെ നിര്ദ്ദേശപ്രകാരം മോഹന് സിങിനെ പ്രതികള് ഒരു പാര്ട്ടിക്ക് ക്ഷണിച്ചു. പാര്ട്ടിക്കിടെ യുവാവിനെ കൊലപ്പെടുത്തിയ ശേഷം പ്രതികള് മൃതദേഹം വികൃതമാക്കുകയായിരുന്നു. മോഹനെ കാണാനില്ലെന്ന് കാണിച്ച് ബന്ധുക്കള് പൊലീസില് നല്കിയ പരാതിയെ തുടര്ന്ന് നടത്തിയ അന്വേഷണത്തിലാണ് മൃതദേഹം കണ്ടെത്തിയത്.
സംഭവത്തെ തുടര്ന്ന് പൊലീസ് പ്രതികള്ക്കായുള്ള തിരച്ചില് ഊര്ജ്ജിതമാക്കിയിട്ടുണ്ട്. മൃതദേഹം പോസ്റ്റുമോര്ട്ടത്തിന് ശേഷം ബന്ധുക്കള്ക്ക് വിട്ടുനല്കും.