രാജസ്ഥാനിലെ നാഗൗര് ജില്ലയിൽ ഭാര്യയെ ക്രൂരമായി മര്ദ്ദിച്ച് ബൈക്കില് കെട്ടി ഗ്രാമത്തിലൂടെ വലിച്ചിഴച്ച സംഭവത്തില് യുവാവ് അറസ്റ്റില്. പ്രേമറാം മേഘ്വാൾ(32) എന്നയാളാണ് അറസ്റ്റിലായത്. മദ്യലഹരിയില് ഭാര്യയെ മര്ദ്ദിച്ച ശേഷം ബൈക്കില് കെട്ടി വലിച്ചിഴയ്ക്കുന്ന ദൃശ്യം സമൂഹമാധ്യമങ്ങളില് വൈറലായതിനെത്തുടര്ന്നാണ് പൊലീസ് നടപടിയെടുത്തത്.
കഴിഞ്ഞ മാസമാണ് ഞെട്ടിക്കുന്ന സംഭവം നടന്നത്. ഇതിന്റെ വീഡിയോ അടക്കം സാമൂഹ്യ മാധ്യമങ്ങളിൽ വന്നിരുന്നു. സോഷ്യൽ മീഡിയയിൽ വ്യാപകമായി പ്രചരിക്കുന്ന ഒരു ഭയാനകമായ വീഡിയോയിൽ, പ്രതി ഭാര്യയെ തൻ്റെ മോട്ടോർ സൈക്കിളിൽ കെട്ടിയിട്ട് വലിച്ചിഴയ്ക്കുന്നതിന് മുമ്പ് മർദ്ദിക്കുന്നത് കാണാം. ക്ലിപ്പ് സോഷ്യൽ മീഡിയയിൽ വൈറലായതിനെ തുടർന്നാണ് പ്രേമറാം മേഘ്വാൾ എന്ന പ്രതിയെ അറസ്റ്റ് ചെയ്തത്.
മദ്യത്തിന് അടിമയായ ഇയാള് മദ്യപിച്ചു വന്ന് ഭാര്യയെ നിരന്തരം മര്ദ്ദിക്കുമായിരുന്നുവെന്ന് അയല്വാസികള് പറഞ്ഞു. ഗ്രാമത്തിലെ മറ്റാരെങ്കിലുമായി സംസാരിക്കാനും ഇയാള് ഭാര്യയെ അനുവദിച്ചിരുന്നില്ലെന്ന് പൊലീസ് പറയുന്നു. യുവതി ഇപ്പോൾ ബന്ധുക്കൾക്കൊപ്പമാണ് താമസിക്കുന്നത്, ഭര്ത്താവിന്റെ മര്ദ്ദനം ഭയന്ന് യുവതി പരാതി നൽകിയിരുന്നില്ല.