ഡൽഹിയിൽ ശനിയാഴ്ച രാവിലെ 59 കാരിയായ സ്ത്രീയെ മോട്ടോർ സൈക്കിളിൽ വന്ന അജ്ഞാതർ വെടിവച്ച് കൊലപ്പെടുത്തി. ഉഷാ സാഹ്നി എന്ന ചാർട്ടേഡ് അക്കൗണ്ടന്റ് രാവിലെ ആറരയോടെ ഭർത്താവിനെ ഡയാലിസിസിനായി ആശുപത്രിയിലേക്ക് കൊണ്ടു പോവുന്നതിനിടെയാണ് കിഴക്കൻ ഡൽഹിയിലെ പട്പർഗഞ്ചിൽ വച്ച് അജ്ഞാതരുടെ വെടിയേറ്റു മരിച്ചത്, പോലീസ് പറഞ്ഞു.
ആശുപത്രിയിലേക്കുള്ള യാത്രാമധ്യേ ക്ഷേത്രത്തിൽ ദമ്പതികൾ തങ്ങളുടെ കാർ നിർത്തുകയായിരുന്നു. ശനി ക്ഷേത്രത്തിനുള്ളിൽ കയറിയ ഭർത്താവിനെ തന്റെ കാറിൽ കാത്തിരിക്കുകയായിരുന്നു ഉഷാ സാഹ്നി. ഈ സമയം ബൈക്കിൽ വന്ന ഒരു സംഘം പുരുഷന്മാർ അവരെ തൊട്ടടുത്ത് വച്ച് വെടിവച്ചു കൊല്ലുകയായിരുന്നു. വെടിവയ്പ്പ് കഴിഞ്ഞയുടനെ അക്രമികൾ രക്ഷപ്പെട്ടു.
രക്തത്തിൽ കുളിച്ചു കിടക്കുന്ന ഭാര്യയെ കണ്ട ഭർത്താവ് നാട്ടുകാരുടെ സഹായത്തോടെ സമീപത്തെ ഒരു സ്വകാര്യ ആശുപത്രിയിലേക്ക് അവരെ കൊണ്ടുപോയി. അവിടെവച്ച് ഡോക്ടർമാർ മരണം സ്ഥിതീകരിച്ചു.
പരസ്പര ശത്രുതയാവാം സംഭവത്തിന് പിന്നിൽ എന്നാണ് സിസിടിവി ദൃശ്യങ്ങൾ പരിശോധിച്ച ശേഷം പോലീസ് സംശയിക്കുന്നത്. അക്രമികളെ ഇതുവരെ അറസ്റ്റ് ചെയ്തിട്ടില്ല.