ബലാത്സംഗങ്ങൾ സമൂഹത്തിന്‍റെ ഭാഗമാണെന്ന വിവാദ പ്രസ്താവനയുമായി ഹരിയാന പോലീസ് മേധാവി. ഹരിയാന എഡിജിപി ആർ.സി മിശ്രയാണ് വിവാദ പരാമർശം നടത്തിയത്. ബലാത്സംഗങ്ങൾ സമൂഹത്തിന്‍റെ ഭാഗമാണ്.
ഇത്തരം സംഭവങ്ങൾ എല്ലായിപ്പോഴും നടക്കുന്നുണ്ട്. പോലീസിന്‍റെ ജോലി സംഭവം അന്വേഷിക്കുക, ക്രിമിനലുകളെ പിടികൂടുക, കുറ്റകൃത്യം തെളിയിക്കുക എന്നിവയാണ്. ഇതിനായി പോലീസിനെക്കൊണ്ട് ചെയ്യാവുന്നതെല്ലാം ചെയ്യുമെന്നും അദ്ദേഹം പറഞ്ഞു.
ഹരിയാനയിൽ കഴിഞ്ഞ ദിവസം 15 വയസുകാരിയായ പെൺകുട്ടി കൂട്ടമാനഭംഗത്തിനിരയായി കൊല്ലപ്പെട്ടിരുന്നു. കുരുക്ഷേത്രയ്ക്ക് സമീപം ട്യൂഷനുപോയ പെൺകുട്ടിയെ കാണാതാവുകയായിരുന്നു. ശനിയാഴ്ച പെൺകുട്ടിയുടെ മൃതദേഹം വികൃതമാക്കിയ നിലയിൽ കണ്ടെത്തുകയും ചെയ്തു. ജിന്ദിലെ ജ്യോതിസറിൽ നിന്നും 100 കിലോമീറ്റർ അകലെയായിരുന്നു മൃതദേഹം കണ്ടെത്തിയത്.
സംഭവുമായി ബന്ധപ്പെട്ട് പോലീസ് സംശ‍യിക്കുന്ന 19 കാരനായ പ്ലസ്ടു വിദ്യാർഥിയെയും കൊല്ലപ്പെട്ടനിലയിൽ ഇന്ന് കണ്ടെത്തി. ഈ സംഭവത്തോട് പ്രതികരിക്കുന്നതിനിടെയാണ് പോലീസ് മേധാവി വിവാദ പ്രസ്താവന നടത്തിയത്.