ഉത്തരാഖണ്ഡില് വീണ്ടും മേഘവിസ്ഫോടനം. ഉത്തരകാശിയിലെ സുഖി ടോപ്പില് സൈനിക ക്യാമ്പിന് സമീപമാണ് മേഘവിസ്ഫോടനമുണ്ടായതായി റിപ്പോര്ട്ടുകള് പുറത്തുവരുന്നത്. ധരാലിക്ക് സമീപം സ്ഥിതിചെയ്യുന്ന ഈ പ്രദേശത്ത് മേഘവിസ്ഫോടനമുണ്ടായതായി ഉത്തരകാശി ജില്ലാ ഭരണകൂടം സ്ഥിരീകരിച്ചു.
രക്ഷാപ്രവര്ത്തക സംഘങ്ങളെല്ലാം ധരാലിയിലെ വന് മേഘവിസ്ഫോടനം നടന്ന സ്ഥലത്താണെന്നതിനാല് പുതിയ സംഭവം കൂടുതല് ആശങ്കകള്ക്ക് വഴിവെയ്ക്കുന്നുണ്ട്. മേഖലയിലെ സ്ഥിതിഗതികള് സൂക്ഷ്മമായി വിലയിരുത്തുകയാണ് അധികൃതര്. രണ്ടാമത്തെ മേഘവിസ്ഫോടനം മൂലമുണ്ടായ നാശനഷ്ടങ്ങള് വിലയിരുത്തുകയാണ്.
എസ്ഡിആര്എഫ്, സൈനിക യൂണിറ്റുകള് എന്നിവയുള്പ്പെടെയുള്ള അടിയന്തര സംഘങ്ങള്ക്ക് ജാഗ്രതാനിര്ദേശം നല്കിയിട്ടുണ്ട്. മേഖലയില് ശക്തമായ മഴ തുടരുന്നതിനാല് താമസക്കാര് വീടുകളില്ത്തന്നെ കഴിയണമെന്നും അപകടസാധ്യതാ മേഖലകള് ഒഴിവാക്കണമെന്നും അധികൃതര് ആവശ്യപ്പെട്ടു.
ചൊവ്വാഴ്ച ഉച്ചയ്ക്ക് 1.45-ഓടെയാണ് ആദ്യത്തെ വന് മേഘവിസ്ഫോടനമുണ്ടായത്. മണ്ണിടിച്ചിലിലും മിന്നല് പ്രളയത്തിലും പെട്ട് അന്പതിലധികംപേരെ കാണാതായി. നാലുപേര് മരിച്ചതായി ഔദ്യോഗികമായി സ്ഥിരീകരിച്ചിട്ടുണ്ട്. വലിയതോതിലുള്ള സ്വത്തുനാശവും റിപ്പോര്ട്ട് ചെയ്തിട്ടുണ്ട്.