ബിഹാറിലെ ബഹുസ്വരായി മണ്ഡലത്തില്‍ നിന്നും കന്നിയങ്കത്തിനിറങ്ങുന്ന കനയ്യ കുമാറാറിന്റെ പത്രികാ സമര്‍പ്പണം മഹാസംഭവമാക്കാന്‍ സി പി ഐ. നാളെയാണ് കനയ്യ കുമാര്‍ പത്രിക സമര്‍പ്പിക്കുന്നത്. രാജ്യം ഉറ്റു നോക്കുന്ന കനയ്യ കുമാറിന്റെ സ്ഥാനാര്‍ത്ഥിത്വത്തിന് ഐക്യദാര്‍ഢ്യം പ്രഖ്യാപിച്ച് ബോളിവുഡ് താരദമ്പതികളായ ജാവേദ് അക്തറും ഭാര്യ ഷബാന ആസ്മിയും പത്രികാസമര്‍പ്പണത്തിനെത്തുമെന്നാണ് പ്രതീക്ഷിക്കുന്നത്.
കേന്ദ്ര സാഹിത്യ അക്കാദമി അവാര്‍ഡ് ജേതാവും കവിയും ഗാനരചയിതാവുമായ ജാവേദ് അക്തറും നടി ഷബാനയും പത്രികാസമര്‍പ്പണത്തിനോ അതിനു ശേഷം പ്രചാരണത്തിനോ എത്തുമെന്നാണ് കരുതുന്നതെന്ന് കനയ്യ കുമാറിന്റെ സഹോദരന്‍ പ്രിന്‍സ് കുമാര്‍ പറഞ്ഞു. നടി സ്വര ഭാസ്‌കര്‍, പ്രകാശ് രാജ്, ഹാര്‍ദിക് പട്ടേല്‍, ജിഗ്നേഷ് മേവാനി തുടങ്ങിയവരും ഗുര്‍മീര്‍ കൗര്‍, ഷെഹ് ല് റെഷീദ് തുടങ്ങിയ ജെ എന്‍ യു സുഹൃത്തുക്കളും പത്രികാ സമര്‍പ്പണത്തെനെത്തുമെന്ന് പ്രതീക്ഷിക്കുന്നതായി പ്രിന്‍സ് പറഞ്ഞു.
ജവഹര്‍ലാല്‍ നെഹ്റു യൂണിവേഴ്‌സിറ്റിയില്‍ പ്രകടനം നയിച്ചതിന് രാജ്യദ്രോഹ കുറ്റം ചുമത്തി ബിജെപി സര്‍ക്കാര്‍ ജയിലിലടച്ച കനയ്യക്ക് രാജ്യവ്യാപകമായി പിന്തുണ ഒഴുകിയെത്തുകയായിരുന്നു. ഈ ജനകീയ പിന്തുണ കണക്കിലെടുത്ത് പാര്‍ട്ടി ബഹുസ്വരായി മണ്ഡലത്തില്‍ സ്ഥാനാര്‍ത്ഥിയായി നിര്‍ത്തുകയായിരുന്നു.