ഹിറ്റ്ലര്ക്കുശേഷം ലോകം കണ്ട ഏറ്റവും വലിയ ഭീകരവാദിയാണ് ഇസ്രായേല് പ്രധാനമന്ത്രി ബെഞ്ചമിന് നെതന്യാഹുവെന്ന് പീപ്പിള്സ് ഡെമോക്രാറ്റിക് പാര്ട്ടി പ്രസിഡന്റ് മെഹബൂബ മുഫ്തി. നെതന്യാഹുവിന്റെ നേതൃത്വത്തിലുള്ള സൈന്യം ഫലസ്തീനെയും ലബനനെയും ‘ഗ്യാസ് ചേംബറു’കളാക്കി മാറ്റുകയാണ്.
നിരപരാധികളെ കൊല്ലാന് ഇന്ത്യ ആയുധം നല്കി നെതന്യാഹുവിനെ പിന്തുണക്കുകയാണ്. മോദി സര്ക്കാരിന്റെ ഈ നടപടി തെറ്റാണെന്നും അവര് പറഞ്ഞു. മഹാത്മാഗാന്ധിയുടെ കാലം മുതല് രാജ്യം പലസ്തീനികള്ക്കൊപ്പമാണ്. ഹിസ്ബുല്ല നേതാവ് ഹസന് നസ്റുല്ലയെ രക്തസാക്ഷിയെന്ന് വിശേഷിപ്പിച്ച തനിക്കെതിരെ രംഗത്തുവന്ന ബി.ജെ.പിയെയും മെഹബൂബ വിമര്ശിച്ചു.
കഠ്വയില് എട്ടുവയസ്സുകാരിയെ പീഡിപ്പിച്ച് കൊലപ്പെടുത്തിയവര്ക്കൊപ്പം നിന്നവരാണ് ബിജെപിക്കാര്. നസ്റുല്ലക്കും പലസ്തീനികള്ക്കുംവേണ്ടി രാജ്യത്ത് തെരുവിലിറങ്ങുന്ന പതിനായിരങ്ങളെ ബിജെപി കാണുന്നില്ലേ. കഴിഞ്ഞ ദിവസം നസ്റുല്ലയുടെ വധത്തില് അപലപിച്ച് മെഹബൂബ മുഫ്തി ഒരു ദിവസം തെരഞ്ഞെടുപ്പ് പ്രചാരണം നിര്ത്തിവെച്ചിരുന്നു.
പലസ്തീനിലേയും ലെബനനിലേയും ജനങ്ങള്ക്കൊപ്പമാണ് നിലയുറപ്പിക്കുന്നതെന്നും അഗാതമായ ദുഃഖത്തിന്റേയും പ്രതിരോധത്തിന്റേയും മണിക്കൂറുകളിലൂടെയാണ് ലെബനന് കടന്നുപോകുന്നതെന്നും മെഹബൂബ മുഫ്തി പറഞ്ഞു.
ലെബനന്റെ തലസ്ഥാനമായ ബെയ്റൂത്തില് വെള്ളിയാഴ്ച നടന്ന ആക്രമണത്തിലാണ് ഹസന് നസ്റല്ല കൊല്ലപ്പെട്ടത്. ഹിസ്ബുല്ല നേതൃത്വം ഇക്കാര്യം സ്ഥിരീകരിച്ചിട്ടുണ്ട്. നസ്റുല്ലയുടെ കൊലപാതകത്തില് ശക്തമായി തിരിച്ചടിക്കുമെന്ന് ഹിസ്ബുല്ല നേതൃത്വം മുന്നറിയിപ്പ് നല്കി. ലെബനനില്, പ്രത്യേകിച്ച് ഷിയാ അനുയായികള്ക്കിടയില് ആധിപത്യമുള്ള നേതാവാണ് നസ്റല്ല. 1992 ഫെബ്രുവരി മുതല് ഹിസ്ബുള്ളയുടെ സെക്രട്ടറി ജനറലായിരുന്നു. ചെറുപ്പം മുതല് മതപഠനം നടത്തിയ നസ്റല്ല ഒടുവില് ഷിയാ രാഷ്ട്രീയ, അര്ദ്ധസൈനിക വിഭാഗമായ അമല് മൂവ്മെന്റില് ചേര്ന്നു. 1982-ല് ലെബനനിലെ ഇസ്രയേല് അധിനിവേശത്തില് വന് നാശനഷ്ടമുണ്ടായിരുന്നു. അന്ന് ഹിസ്ബുള്ള സ്ഥാപിക്കുന്നതില് നിര്ണായക പങ്കുവഹിച്ചയാളാണ് നസ്റല്ല.