അരുണാചൽ പ്രദേശിൽ രണ്ട് സൈനികരെ കാണാതായി. കൊൽക്കത്ത ആസ്ഥാനമായി പ്രവർത്തിക്കുന്ന ഈസ്റ്റേൺ കമാൻഡിന് കീഴിൽ വരുന്ന കിഴക്കൻ സെക്ടറിലെ സെെനികരെയാണ് 15 ദിവസമായി കാണാതായിരിക്കുന്നത്.
മേയ് 28 മുതലാണ് ഇരുവരെയും കാണാതായതെന്നും അന്വേഷണം തുടരുകയാണെന്നും സെെനിക വൃത്തങ്ങൾ അറിയിച്ചു. 7ാം ഗർവാൾ റൈഫിളിലെ ഉത്തരാഖണ്ഡ് സ്വദേശികളായ ലാൻസ് നായിക് ഹരേന്ദ്ര നേഗി, നായിക് പ്രകാശ് സിംഗ് റാണ എന്നിവരെയാണ് കാണാതായത്.
അൻജോ ജില്ലയിൽ ഇന്ത്യ – ചൈന അതിർത്തിയിലെ തക്ക്‌ല പോസ്റ്റിൽ വിന്യസിക്കപ്പെട്ടിരുന്ന ഇരുവരും മെയ് 28 ന് വിന്യാസ പ്രദേശത്തെ നദിയിലേക്ക് തെന്നിവീണതാണ് സംശയം.
രണ്ടാമത്തെ സൈനികൻ ആദ്യത്തെയാളെ രക്ഷിക്കാൻ പോയതിനിടയിൽ നദിയിൽ അബദ്ധത്തിൽ വീണെന്ന് കരുതുന്നു. രണ്ട് സൈനികരുടെയും കുടുംബാംഗങ്ങളെ വിവരമറിയിച്ചിട്ടുണ്ട്
