പഞ്ചാബില്‍ അമരീന്ദര്‍ സിങ്ങിന്റെ പഞ്ചാബ് ലോക് കോണ്‍ഗ്രസ് പാര്‍ട്ടി നിയമസഭാ തിരഞ്ഞെടുപ്പിനുള്ള ആദ്യഘട്ട സ്ഥാനാര്‍ഥി പട്ടിക പ്രഖ്യാപിച്ചു. ആദ്യഘട്ടത്തില്‍ 22 സ്ഥാനാര്‍ഥികളെയാണ് പ്രഖ്യാപിച്ചിരിക്കുന്നത്. രണ്ടാംഘട്ട പട്ടിക ഉടന്‍ പ്രഖ്യാപിക്കുമെന്നും അമരീന്ദര്‍ സിങ് പറഞ്ഞു.
ആദ്യ പട്ടികയില്‍ ഒരു വനിതാ സ്ഥാനാര്‍ഥി മാത്രമാണുള്ളത്. മുന്‍ ശിരോമണി അകാലിദള്‍ എംഎല്‍എയും അന്തരിച്ച ഡിജിപി ഇസ്ഹാര്‍ ആലം ഖാന്റെ ഭാര്യയുമായ ഫര്‍സാന ആലം ഖാന്‍. അവര്‍ മാള്‍വ മേഖലയിലെ മലേര്‍കോട്ലയില്‍ മത്സരിക്കും.
ആദ്യഘട്ടത്തില്‍ 22 സ്ഥാനാര്‍ഥികളെയാണ് പ്രഖ്യാപിക്കുന്നതെന്നും രണ്ട് ദിവസത്തിനുള്ളില്‍ രണ്ടാം ഘട്ട പട്ടിക പുറത്തിറക്കാന്‍ സാധ്യതയുണ്ടെന്നും അമരീന്ദര്‍ സിങ് പറഞ്ഞു. സ്ഥാനാര്‍ത്ഥികള്‍ക്കെല്ലാം ശക്തമായ രാഷ്ട്രീയ പശ്ചാത്തലമുണ്ട്.ഒപ്പം അതാത് മണ്ഡലങ്ങളില്‍ അറിയപ്പെടുന്ന മുഖങ്ങളാണെന്നും ആദ്യഘട്ട പട്ടിക പുറത്തിറക്കിക്കൊണ്ട് അമരീന്ദര്‍ സിങ് പറഞ്ഞു.
ബി.ജെ.പി, എസ്.എ.ഡി. എന്നീ പാര്‍ട്ടികളുമായി ചേര്‍ന്ന് സഖ്യത്തില്‍ മത്സരിക്കുന്ന പഞ്ചാബ് ലോക് കോണ്‍ഗ്രസ് പാര്‍ട്ടിക്ക് 117 അംഗ നിയമസഭ തിരഞ്ഞെടുപ്പില്‍ 37 സീറ്റാണ് നിലവില്‍ ലഭിച്ചിരിക്കുന്നത്. അഞ്ച് സീറ്റുകള്‍കൂടി ലഭിക്കുന്നതിനുള്ള ചര്‍ച്ചകള്‍ പുരോഗമിക്കുകയാണ്. ഫെബ്രുവരി 20നാണ് പഞ്ചാബ് തിരഞ്ഞെടുപ്പ് .